माथिल्लो तामाकोशीबाट ३८० मेगावाट विद्युत उत्पादन

काठमाडौं, भदौ ४ : माथिल्लो तामाकोशी जलविद्युत आयोजनाबाट तीन सय ८० मेगावाट विद्युत उत्पादन हुन थालेको छ ।

आयोजनाका पाँचवटा युनिटबाट विद्युत उत्पादन सुरु भएको हो । आयोजना स्थल दोलखाको विगु गाउँपालिका–१ गोगरमा पर्छ ।

आयोजना प्रमुख विज्ञान श्रेष्ठका अनुसार स्वदेशी लगानीमा निर्माणधीन आयोजनाको पाँचवटै युनिटबाट विद्युत उत्पादन सुरु भएको हो । त्यससँगै तीन सय ८० मेगावट विद्युत राष्ट्रिय प्रसारण लाइनमा जोडिएको छ ।

भदौभरिमा सबै युनिटबाट पूर्ण क्षमतामा बिजुली उत्पादन गर्ने आयोजनाको लक्ष्य छ । सबै युनिटबाट गरी चार सय ५६ मेगावट विद्युत राष्ट्रिय प्रसारण लाइनमा जोडिने छ ।