यही सातामा सरकारले पूर्णता पाउँछः रामकृष्ण यादव

काठमाडौं, भदौ १ : सत्तारुढ कांग्रेस नेता तथा पूर्वमन्त्री रामकृष्ण यादवले यही साताभित्र सरकारले पूर्णता पाउने बताएका छन् ।

रिपोर्टर्स क्लबको साक्षात्कार कार्यक्रममा यादवले मंगलबार मन्त्रिपरिषद् विस्तारबारे व्यापक छलफल भइरहेको जानकारी दिए ।

‘मन्त्रिपरिषद् विस्तार यही साताभित्र हुन्छ । त्यसका लागि व्यापक छलफल भइरहेको छ,’ उनले भने, ‘गठबन्धनका नेताहरूसँग प्रधानमन्त्री शेरबहादुर देउवाले निरन्तर छलफल गरिरहनुभएको छ । मलाई लाग्छ, यो साताभित्र सरकारले पूर्णता पाउँछ ।’

यस्तै, अफगानिस्तानमा फसेका नेपाली नागरिकलाई तत्काल उद्धार गर्ने काम थालनी भइसकेको उनले बताए । ‘अफगानिस्तानमा रहेका नेपाली नागरिक भयभित भएका छन् । नेपाल सरकारले कूटनीतिक पहल र दूतावासको माध्यमबाट उद्धार पनि गरेको छ,’ उनले भने, ‘त्यहाँ अड्किएका नागरिकलाई उद्धार गरेर सरकारले स्वदेश फर्काउँछ । अविलम्ब नेपाल सरकारले आफ्ना नागरिकको उद्धार गर्छ । सरकार नेपाली नागरिकको उद्धारका लागि अहिले सक्रियतापूर्वक लागेको छ । मलाई विश्वास छ, यो सरकारले आफ्ना नागरिकलाई उद्धार गरिछाड्छ ।’