प्राधिकरणमा ‘उज्यालो नेपाल अभियन्ता’को दोस्रो इनिङ

काठमाडौं, साउन २७ : नेपाल विद्युत प्राधिकरणमा नवनियुक्त कार्यकारी निर्देशक कुलमान घिसिङ उज्यालो नेपाल अभियानका मुख्य अभियन्ता मानिन्छन् ।

रामेछापको बेथानमा जन्मेका हुन् घिसिङ । गाउँमै कक्षा–५ उत्तीर्ण गरेपछि परिवारले उनलाई काठमाडौं ल्यायो । काठमाडौंमै उनले आईएस्सीसम्म अध्ययन गरे । त्यसपछि छात्रवृत्तिमा भारतमा जम्सेदपुरबाट विद्युतीय इन्जिनियरिङ र पुल्चोक क्याम्पसबाट ‘पावर सिस्टम इन्जिनियरिङ’मा स्नातकोत्तर गरेका हुन् । त्यसपछि पोखरा विश्वविद्यालयबाट ईएमबीए अध्ययन गरे ।

०५१ सालतिर उनी विद्युत प्राधिकरणमा सातौँ तहको इन्जिनियर भए । प्राधिकरणमा कार्यरत छँदा उनलाई रसुवाको चिलिमे जलविद्युत परियोजनाको प्रबन्ध निर्देशकको जिम्मेवारी दिइयो । चिलिमे आयोजनाको सफल कार्यान्वयनपछि उनको चर्चा चुलिएको हो ।

भदौ ०७३ मा प्राधिकरणको प्रबन्ध निर्देशकको जिम्मेवारी पाएपछि मुलुकलाई लोडसेडिङमुक्त गरेर देखाइदिए उनले । त्यसैले उनलाई उज्यालो नेपाल अभियानका मुख्य हर्ताकर्ता मानिन्छ ।

१४ कात्तिक ०७३ मा काठमाडौं उपत्यकालाई लोडसेडिङमुक्त गराए । र, १ चैत ०७३ देखि देशभर लोडसेडिङ अन्त्य गराए ।

आफ्नो कार्यकालमा उनले करिब २६ प्रतिशत विद्युत् चुहावटलाई १५ प्रतिशतमा झार्न सफलता पाएका थिए ।

उनकै कार्यकालमा ६० मेगावाटको त्रिशुली थ्री–ए, चमेलिया र कुलेखानी–३ लगायत आयोजना सम्पन्न गराए ।

कोभिड–१९ महामारीका कारण निर्माण सम्पन्न हुन नसकेका विद्युत आयोजनाहरू सञ्चालनमा ल्याउने, विद्युत प्राधिकरणमा प्रणाली बसाल्ने, विद्युतको स्वदेशी खपत बढाउने र अन्तर्राष्ट्रिय व्यापारका लागि ढोका खोल्नेलगायत काम उनको पछिल्लो कार्यकालका अपेक्षित उपलब्धी हुन सक्छन् ।