सप्तकोशीमा पानीको बहाव उच्च, ३० वटा ढोका खोलियो

सुनसरी, असार २८ : सुनसरीको सप्तकोशी नदीमा पानीको बहाव उच्च भएको छ। 

शनिबार बिहानको मापनअनुसार नदीमा दुई लाख २६ हजार ७०० क्यूसेक पानी पुगेको कोशी व्यारेजस्थित कन्ट्रोल रुमले जनाएको छ। पानीको बहाव उच्च भएपछि ५५ मध्ये ३० ढोका खोलिएको छ। 

नदीले चतरामा जलसतहले सतर्कता तह पार गरेको र अझै बढ्दो क्रममा रहेकाले सुनसरी र सप्तरीका नदीतटीय क्षेत्रमा उच्च सतर्कता अपनाउन स्थानीय प्रशासनले अनुरोध गरेको छ।

पानीको बहाव बढेर गएपछि पूर्वपश्चिम आवतजावत गर्ने सवारीसाधनलाई पालोपालो जाने व्यवस्था गरिएको सशस्त्र प्रहरी बल भण्टाबारीका प्रहरी निरीक्षक सुरेन्द्र भण्डारीले जानकारी दिए। 

शुक्रबारदेखि कोशी ब्यारेजमा खतराको सैकेतस्वरुप  रातो बत्ती बालिएको छ। पानीको बहाव घटाउन दुवैतिरको नहर पनि खोलिएको छ।