लुम्बिनी प्रदेशसभाको विशेष अधिवेशन रोक्न माग गर्दै एमाले सांसदद्वारा रिट दायर

काठमाडौं, साउन २५ : एमाले सांसद लीला गिरीले सोमबार लुम्बिनी प्रदेशसभाको विशेष अधिवेशन रोक्न माग गर्दै सर्वोच्च अदालतमा रिट दायर गरेका छन् ।

मुख्यमन्त्री शंकर पोखरेलविरुद्ध प्रदेशसभामा दर्ता भएको अविश्वास प्रस्तावमाथि छलफल गर्न २७ साउनमा विशेष अधिवेशन बोलाइएको छ ।

एक कानून व्यवसायीले विशेष अधिवेशन रोक्न माग गर्दै दायर गरेको रिटमा हकदैया नपुगेको उल्लेख गर्दै सर्वोच्च प्रशासनले दरपिठ गरिदिएको थियो ।

जसपाका तीन सांसद पदमुक्त भएकाले लुम्बिनी प्रदेशसभामा अहिले ७७ सदस्य मात्र छन् । मुख्यमन्त्री पोखरेलविरुद्ध दर्ता भएको अविश्वास प्रस्तावमा ३४ सांसदको हस्ताक्षर छ ।

तथापि, विपक्षी गठबन्धनमा माओवादी केन्द्रका १७, कांग्रेसका १९, जसपाका तीन र राष्ट्रिय जनमोर्चाका एक गरी ४० सदस्य छन् । एमालेका ३९ सांसद मुख्यमन्त्री पोखरेलका पक्षमा छन् । वैकल्पिक सरकार बनाउन ३९ सांसद भए पुग्छ ।