कांग्रेस क्रियाशील सदस्यता छानविन समितिले प्रतिवेदन बुझायो, बाँकी काम शीर्ष तहबाट

काठमाडौं, साउन १४ : नेता रमेश लेखकको संयोजकत्वमा गठित कांग्रेस क्रियाशील सदस्यता छानविन समितिले आफ्नो प्रतिवेदन सभापति शेरबहादुर देउवालाई बुझाएको छ । टुंगिन बाँकी विवाद समाधान शीर्ष नेताबाट हुने गरी समितिले प्रतिवेदन बुझाएको हो ।

सभापति देउवाको बूढानीलकण्ठस्थित निवासमा बसेको पदाधिकारी बैठकमा समितिले बुझाएको हो। समितिका अनुसार करिब एक सयवटा वडामा क्रियाशील सदस्यताबारे विवाद कायम छ । देशभर ६ हजार सात सय ४३ वडा छन् । ती सबैको विवाद समाधान गर्ने जिम्मा समितिले शीर्ष नेतृत्वलाई हस्तान्तरण गरेको छ । विवाद रहेका वडाको नयाँ र समायोजित क्रियाशील सदस्यता स्थगित गरिएको छ । र, पुराना क्रियाशील सदस्यता नवीकरण गरिएको छ ।

सप्तरी, बारा, रसुवा र सिन्धुपाल्चोकमा रहेको विवाद समाधान शीर्ष तहबाटै खोजिने भएको छ ।