चार पूर्वमाओवादी नेताहरूको रिट न्यायाधीश कार्कीको इजलासमा सुनुवाइ हुँदै

काठमाडौं, साउन १४ : चार पूर्वमाओवादी नेताहरूले सांसद पदमा पुनर्बहाली माग गर्दै दायर गरेको रिटमाथि बिहीबार न्यायाधीश दीपककुमार कार्कीको इजलासमा सुनुवाइ हुँदैछ ।

तत्कालीन नेकपा खारेजीपछि एमालेतिर लागेका टोपबहादुर रायमाझी, लेखराज भट्ट, प्रभु साह र गौरीशंकर चौधरीले बुधबार सांसद पदमा पुनर्बहाली माग गर्दै सर्वोच्च अदालतमा रिट दायर गरेका थिए। 

एमालेतिर लागेपछि उनीहरूलाई कारवाही गर्दै माओवादी केन्द्रले २६चैतमा सांसदबाट बर्खास्त गरेको थियो । परमादेशबाट सांसद पदमा पुनर्बहाली गर्न उनीहरूले माग गरेका छन्।

आफूहरूले दल त्याग नगरेको र निर्वाचन आयोगले २३ असारको विवरणमा आफूहरू माओवादी केन्द्रकै सदस्य रहेको उनीहरूको जिकिर छ ।

यस्तै, माओवादी केन्द्र परित्याग गरी एमाले प्रवेश गरेका लुम्बिनी प्रदेशका सांसदहरू दधिराम न्यौपानेको रिटमाथि पनि न्यायाधीश कार्कीकै इजलासमा सुनुवाइ हुने कार्यसूची छ । पार्टी परित्याग गरेपछि उनलाई पनि माओवादी केन्द्रले कारवाही गर्दै सांसदबाट हटाएको थियो । पुनर्बहाली माग गर्दै उनले सर्वोच्चमा रिट दायर गरेका छन् ।