चिनियाँ कम्पनीसँग खरिद गरिएको कोरोना खोप १५ साउनसम्ममा आउने

काठमाडौं, साउन २ : चिनियाँ कम्पनीसँग खरिद गरिएको ३२ लाख डोज कोभिड खोप १५ साउनभित्र आयात गरिसक्ने तयारी सरकारले गरेको छ ।

चीनमा निर्मित भेरोसेल खोप नेपाल वायु सेवा निगमको वाइडबडी विमानमार्फत ल्याउने तयारी भइरहेको स्वास्थ्य तथा जनसंख्या मन्त्रालयले जनाएको छ ।

मन्त्रालयका सहप्रवक्ता डा. समीरमणि अधिकारीका अनुसार ६ साउनदेखि वाइडबडी विमानका तीनवटा उडानमार्फत चीनबाट खोप ल्याउन लागिएको हो ।

यस्तै, भारतमा निर्मित कोभिसिल्ड खोपको पहिलो डोज लगाएका ज्येष्ठ नागरिकलाई छिट्टै दोस्रो डोज दिने तयारी भइरहेको डा. अधिकारीले जानकारी दिए । त्यसका लागि जापानले उपलब्ध गराएको एस्ट्राजेनेका खोप प्रयोग गरिने भएको छ । कोभिसिल्ड पनि एस्ट्राजेनेकाकै सूत्रमा निर्मित खोप हो ।

भारतको सिरम इन्स्टिच्युटसँग सरकारले खरिद गरेको कोभिसिल्ड खोप नपठाएपछि जापानबाट प्राप्त खोप ज्येष्ठ नागरिकलाई दिइन लागेको हो ।

६५ वर्षमाथिको उमेर समूहका करिब साढे १४ लाखजनाले कोभिसिल्डको पहिलो डोज पाएका थिए ।