विवेकशील साझा पार्टीका नेता स्वर्गीय थापाको उपचारबाट बचेको रकम संघसंस्थालाई

काठमाडौं, साउन २ : विवेकशील साझा पार्टीका नेता स्वर्गीय उज्ज्वल थापाको उपचारबाट बचेको ४२ लाख ५२ हजार रुपैयाँ सातवटा संघसंस्थालाई हस्तान्तरण गरिएको छ।

कोरोना र निमोनियाका कारण थापाको उपचारका क्रममा गत १८ जेठमा निधन भएको थियो ।

परिवारका अनुसार उनको उपचारका लागि संसारभरका शुभेच्छुकबाट ६७ लाख ८३ हजार ४ सय ८५ रुपैयाँ संकलन भएको थियो । त्यसमध्ये २४ लाख २० हजार ३ सय ४९ रुपैयाँ उनको उपचारमा खर्च भएको थियो । र, बैंक तथा रकम स्थानान्तरणका लागि एक लाख १० हजार ९ सय ३४ रुपैयाँ खर्च भएको थियो । 

बाँकी ४२ लाख ५२ हजार २ सय रुपैयाँ संघसंस्थालाई वितरण गरिएको हो । कोरोना महामारीका कारण चिकित्सकीय र जीविकोपार्जन समस्या बेहोरिरहेकाहरूका लागि उक्त रकम खर्च हुने परिवारको भनाइ छ ।

सर्लाही, काठमाडौं, कपिलवस्तु, कालिकोट र वीरगञ्जका संघसंस्थाहरूलाई रकम हस्तान्तरण गरिएको हो ।