चीनले नेपाललाई थप १६ लाख डोज कोभिड खोप दिने

काठमाडौं, साउन १ : चीनले नेपाललाई थप १६ लाख डोज कोभिड-१९ विरुद्धको खोप दिने भएको छ ।

प्रधानमन्त्री शेरबहादुर देउवालाई शुक्रबार चिनियाँ राजदूत होउ यान्छीले त्यसबारे जानकारी दिएकी हुन् ।

प्रधानमन्त्री देउवालाई बधाइ ज्ञापन गर्न बालुवाटार पुगेकी राजदूत होउले १६ लाख डोज भेरोसेल खोप अनुदानमा उपलब्ध गराइने बताइन् ।

कोभिड–१९ महामारीविरुद्ध लड्न चीनले नेपाललाई दिँदै आएको सहयता निरन्तर रहने र त्यसको एक पाटोका रूपमा खोप पनि रहेको राजदूत होउले बताएकी थिइन् ।

महामारीविरुद्ध लड्न छिमेकी मुलुक चीनको निरन्तर सहयोगप्रति प्रधानमन्त्री देउवाले धन्यवाद ज्ञापन गरेका थिए । र, थप सहयोगका लागि आग्रह गरेका थिए ।