बैठक रोकेनन् ओलीले, नेपाल पक्षका नेता बाहिरिए

काठमाडौं, साउन १ : एमाले अध्यक्ष केपी ओलीले स्थायी समिति बैठक रोक्न अस्वीकार गरेपछि वरिष्ठ नेता माधवकुमार नेपाल समूहका नेताहरू बैठक स्थलबाट बाहिरिएका छन् ।

बैठकस्थलमा उपस्थित भएर पनि उनीहरूले माइन्युटमा हस्ताक्षर गरेनन् । बैठक रोक्न आग्रह गरे, ओलीले अस्वीकार गरे अनि उनीहरू बैठकस्थलबाट बाहिरिए ।

उपाध्यक्ष भीम रावल, उपमहासचिव घनश्याम भुसाल, सचिव गोकर्ण बिष्ट र भीम आचार्य तथा स्थायी समिति सदस्य सुरेन्द्र पाण्डे बैठक रोक्न माग गर्दै बैठकस्थलमा पुगेका थिए ।

कार्यदलले तयार पारेको प्रतिवेदनमाथि छलफल गर्नुपर्ने उल्लेख गर्दै उनीहरूले बैठक रोक्न माग गरेका हुन् ।

च्यासलस्थित तुलसीलाल अमात्य स्मृति प्रतिष्ठानमा ओली पक्षको स्थायी समिति बैठक जारी छ ।