७६ (५) अन्तर्गत् अर्को प्रधानमन्त्री बन्न नदिन ओलीको चुक्लीः एमिकस क्युरी घिमिरे

काठमाडौं, असार २१ : एमिकस क्युरीका सदस्य वरिष्ठ अधिवक्ता कोमलप्रसाद घिमिरेले आफूबाहेक अर्को प्रधानमन्त्री बन्न नदिन केपी ओलीले चुक्ली लगाएको राय दिएका छन् ।

ओलीले दाबी नगर्ने भनेकाले २१ घण्टाको समय दिएर राष्ट्रपतिबाट सरकार गठनका लागि आह्वान भएको उनले दाबी गरे । तर, ओलीले फेरि दाबी गरेर कांग्रेस सभापति शेरबहादुर देउवासहित १४९ जना सांसदको दाबी पुग्न नदिन ओलीले चुक्ली लगाएको उनको भनाइ थियो । सोही चुक्लीले विवाद उत्पन्न गराएको र असंवैधानिक भएको उनले बताए ।

धारा ७६ (५) अनुसार ओलीले प्रधानमन्त्रीको दाबी गर्नु अवैधानिक भएको उनले राय दिए । ‘प्रधानमन्त्रीले अन्योलमा राख्न उचित नभएको हुँदा वैकल्पिक सरकारका लागि मार्गप्रशस्त गरेको भन्नुभयो । मेरो विकल्प म होइन भनेर स्वीकार्नुभयो। राष्ट्रपतिले खुला दिमागले सोच्दा ओलीले दाबी गर्न नपाउने र अर्को पक्ष मात्र आउने कल्पना गरेर २१ घन्टा समय निर्धारण गरिएको हो,’ घिमिरेले भने ।

तर, ओलीले आफ्नो विकल्प आफैँ हो भनेझैँ गरेर धारा ७६ (५) मा पनि दाबी गरेको उनले बताए । ६ जेठमा वैकल्पिक सरकारका लागि मार्गप्रशस्त गरेको बताएका ओलीले भोलिपल्टै अर्को प्रधानमन्त्रीका लागि आह्वान गरिएको प्रक्रियामा सहभागी भएर आफ्नो विकल्प आफैँ भएको भन्ने देखाएको उनले उल्लेख गरे ।

जनताले नपत्याएको व्यक्ति मन्त्री बन्न नसक्ने संवैधानिक व्यवस्था सम्झाउँदे उनले जनताको विश्वास नपाएको व्यक्ति पनि प्रधानमन्त्री हुन नसक्ने तर्क गरे ।