निषेधाज्ञा उल्लंघन गर्ने १७ सय ९० वटा सवारी साधन नियन्त्रणमा

काठमाडौं, असार १२ : विभिन्न जिल्लामा लागू गरिएको निषेधाज्ञा उल्लंघन गर्ने एक हजार सात सय ९० वटा सवारी साधनलाई प्रहरीले नियन्त्रण लिएको छ ।

तीमध्ये ६ सय १ चारपांग्रे सवारी साधन र एक हजार एक सय ८९ वटा मोटरसाइकल छन् । त्यसरी नियन्त्रणमा लिइएका सवारी साधनलाई सोधपुछपछि छाडिने गरेको छ ।

यस्तै, नयाँ भेरियन्टसहितको कोरोना संक्रमण रोकथाम तथा जोखिम न्यूनीकरणका लागि प्रहरीले सञ्चालन गरेको ‘तपाईंको मास्क खोइ ?’ कार्यक्रमअन्तर्गत पछिल्लो २४ घण्टामा चार सय १५ जनालाई निःशुल्क मास्क वितरण गरिएको छ । कार्यक्रमअन्तर्गत हालसम्म चार लाख ५९ हजार पाँच सय १२ जनालाई निःशुल्क मास्क वितरण गरिएको छ ।

यसैगरी निषेधाज्ञा उल्लंघन गर्ने ६८ जनालाई कोभिड–१९ संकट व्यवस्थापन अध्यादेश, २०७८ बमोजिम जम्मा ६ हजार आठ सय रुपैयाँ जरिवाना गरिएको छ । त्यसक्रममा दुई हजार तीन सय १२ जनालाई रोकी सम्झाइबुझाइ छाडिएको प्रहरीले जनाएको छ ।