७६ (५) मा ७६ (२) भनेको दल होइन, दलका सांसद हुन्ः वरिष्ठ अधिवक्ता यादव

काठमाडौं, असार ९ : वरिष्ठ अधिवक्ता महादेव यादवले संविधानको धारा ७६ (५) मा ७६ (२) को प्रसंग उल्लेख गरिएको दलका लागि नभई सांसदहरूको हकमा रहेको बताएका छन् ।

प्रतिनिधिसभा विघटनविरुद्धको रिटमा बुधबारदेखि सुरु भएको बहसमा सहभागी हुँदै यादवले धारा ७६ (५) मा ७६ (२) अन्तर्गत्का दलका सांसदहरू उल्लेख भएको तर्क गरे । र, उनले उनले संविधानको धारा ७६ (५) अन्तर्गत् दुई वा दुईभन्दा बढी दलको समर्थनमा सरकार बन्ने नभई सांसदहरूको बहुमतका आधारमा सरकार बन्ने दाबी प्रस्तुत गरे ।

यादवले राष्ट्रपतिलाई दाबी पुगेन भन्ने अधिकार नभएको बताए । राष्ट्रपतिले अधिकार प्रयोग गर्ने नभई कर्तव्य वहन गर्ने व्यवस्था संविधानमा रहेको उल्लेख गरे ।

‘राष्ट्रपतिले यसलाई बनाउने, उसलाई बनाउने भन्ने होइन । दाबी पुगेन भन्न मिल्दैन । राष्ट्रपतिलाई त्यो अधिकार छैन । धारा ९९ को अधिकार उहाँलाई होइन, संसद्को अधिकार हो,’ उनले भने ।