गण्डकी प्रदेशसभा बैठक सुरु, विश्वासको मत प्रस्ताव गरे मुख्यमन्त्री पोखरेलले
गण्डकी प्रदेशसभाको बैठक सुरु भएको छ। मुख्यमन्त्री कृष्णचन्द्र नेपाली पोखरेलले आफूलाई प्रदेशसभाको विश्वास छ भन्ने प्रस्ताव प्रस्तुत गरेका छन्।
काठमाडौं, असार ४ : गण्डकी प्रदेशसभाको बैठक सुरु भएको छ । मुख्यमन्त्री कृष्णचन्द्र नेपाली पोखरेलले आफूलाई प्रदेशसभाको विश्वास छ भन्ने प्रस्ताव प्रस्तुत गरेका छन् ।
कांग्रेस संसदीय दलका नेता पोखरेल आफ्नो पार्टी, माओवादी केन्द्र, जसपा र स्वतन्त्र सांसद राजीव गुरुङको समर्थनमा मुख्यमन्त्री नियुक्त भएका थिए ।
३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्था अनुसरण गर्दै उनले विश्वासको मत प्रस्ताव गरेका हुन् ।
६० सदस्यीय प्रदेशसभामा जनमोर्चा सांसद कृष्ण थापा पदमुक्त भएकाले ५९ सदस्य मात्र कायम छन् । त्यसमा पनि सभामुखको संख्या घटाएर ५८ सांसदबाट विश्वासको मतबारे निर्णय हुनेछ ।
विश्वासको मत प्राप्त गर्न मुख्यमन्त्री पोखरेललाई ३० सांसद भए पुग्छ । गण्डकी प्रदेशसभामा कांग्रेसका १५, माओवादी केन्द्रका ११, जसपाका दुई, जनमोर्चाका दुई र स्वतन्त्र एक गरी ३१ सांसद मुख्यमन्त्री पोखरेलको पक्षमा छन् । यस्तै, विपक्षमा रहेको एमालेसँग २७ सांसद छन् ।
