गण्डकीका सांसद थापाको पुनर्बहाली गर्ने अन्तरिम आदेशविरुद्ध जनमोर्चाले दर्ता गरायो पुनरावलोकन

काठमाडौं, जेठ २६ : गण्डकी प्रदेशका सांसद कृष्ण थापालाई पुनर्बहाली गर्न सर्वोच्च अदालतले दिएको अन्तरिम आदेशविरुद्ध राष्ट्रिय जनमोर्चाले पुनरावलोकन निवेदन दर्ता गराएको छ ।

सर्वोच्च अदालतले २३ जेठमा उनलाई पदमुक्त नगर्न अन्तरिम आदेश दिएको थियो । उक्त आदेशविरुद्ध जनमोर्चाको गण्डकी प्रदेशसभा संसदीय दलले पुनरावलोकन निवेदन दिएको हो ।

पार्टीको निर्णय र ह्विप उल्लंघन गरेको बताउँदै जनमोर्चाले सांसद थापालाई दलबाट निष्कासन गरी प्रदेशसभा सचिवालयमा जानकारी दिएको थियो । त्यसपछि सभामुख नेत्रनाथ अधिकारीले प्रदेशसभा बैठकमा थापालाई दलले कारवाही गरेको जानकारी दिएपछि उनी पदमुक्त भएका थिए ।

त्यसविरुद्ध थापाले सर्वोच्चमा रिट दर्ता गराएका थिए । सर्वोच्चले उनीविरुद्धको कारवाहीको निर्णय कार्यान्वयन नगर्न अन्तरिम आदेश दिएको थियो ।