सगरमाथा आरोहणमा ज्यान गुमाउने स्विस नागरिकको शव काठमाडौं ल्याइयो

काठमाडौं, जेठ १९ : सगरमाथाको सफल आरोहणका क्रममा ज्यान गुमाएका स्विस नागरिक अब्दुल वारिचोको शव आज (बुधबार) काठमाडौं ल्याइएको छ।

उनको शव लुक्लाबाट हेलिकप्टरमा काठमाडौं ल्याइएको हो। सगरमाथा आरोहणपछि फर्किने क्रममा ८ हजार मिटर माथि क्याम्पमा वारिचोको ज्यान गएको थियो।

४० वर्षीय वारिचोको निधन अघिल्लो साता बुधबार बेलुकी ८ बजे भएको हो। पोस्टमार्टमपछि उनको शव दूतावासमार्फत परिवारलाई हस्तान्तरण गरिने जनाइएको छ।

यस सिजनमा सगरमाथा आरोहणका लागि मात्रै पर्यटन विभागले ४४ वटा आरोहण दललाई अनुमति दिएको छ। जसमा ९२ महिला र ३ सय १५ पुरुष छन्।