पाँच विद्यार्थी संगठनले भने– संसद विघटन गर्ने निर्णयको प्रतिरोध गर्नुहोस्

काठमाडौं, जेठ ९ : पाँच विद्यार्थी संगठनले संसद विघटन गर्ने निर्णयको प्रतिरोध गर्न आह्वान गरेका छन्। नेपाली कांग्रेस, माओवादी केन्द्र, एमाले माधव नेपाल समूह, जसपा बाबुराम-उपेन्द्र पक्ष र राष्ट्रिय जनमोर्चाका विद्यार्थी नेताहरुले सरकारले जनस्वास्थ्यमाथि गरेको खेलवाडविरुद्ध आ-आफ्नो ठाउँबाट प्रतिरोध गर्न सम्पूर्ण विद्यार्थी तथा आम जनसमुदायमा अनुरोध गरेका छन् । 

उनीहरूले संयुक्त विज्ञप्ति जारी गरेर कोरोना भाइरस नियन्त्रणमा ध्यान नदिएको कारण अस्पतालमा बेड, अक्सिजन, औषधिको हाहाकार मच्चिरहेको र त्यस्तो अवस्थामा मध्यावधि निर्वाचनको घोषणा गर्नु राज्यको देश र जनताप्रति गैरजिम्मेवारीको पराकाष्ठा मात्र नभएर जनताको स्वास्थ्यमाथिको गम्भीर खेलवाड र अपराधसमेत भएको जिकिर पनि गरेका छन्।

सर्वोच्च अदालतले पुनःस्थापना गरेको संसदको दोस्रोपटकको विघटन सर्वभौम जनतामाथि गरिएको निरंकूश र अधिनायकवादी डकैती भएको उल्लेख गर्दै विज्ञप्तिमा भनिएको छ, ‘संयुक्त विद्यार्थी आन्दोलनका तर्फबाट संसद विघटनको घोर निन्दा र भर्त्सना गर्दछौं।’ 

नेपाल विद्यार्थी संघका अध्यक्ष राजीव ढुंगाना, अखिल क्रान्तिकारीका अध्यक्ष रञ्जित तामाङ, अनेरास्ववियु (माधव नेपाल पक्ष) का अध्यक्ष सुदेश पराजुली, समाजवादी विद्यार्थी युनियनका अध्यक्ष रुपनारायण श्रेष्ठ र अखिल छैटौंका अध्यक्ष विमल पोखरेलको हस्ताक्षरमा संयुक्त विज्ञप्ति निकालिएको हो।