बाबुराम भट्टराई १७७६ किलोमिटर लामो मध्यपहाडी यात्रामा

काठमाडौं, माघ १३ : पूर्व प्रधानमन्त्री एवम् नयाँ शक्ति पार्टीका संयोजक डा. बाबुराम भट्टराईले समावेशी विकासबारे अन्तर्संवाद गर्न मध्य पहाडी राजमार्गको एक हजार सात सय ७६ किलोमिटर यात्रा गर्ने भएका छन् ।

पाँचथरको पूर्वी सिमाना चिवाभञ्ज्याङबाट  माघ १५ गते सुरु हुने यात्रा एक महिनापछि फागुन १५ गते पश्चिमी सिमाना बैतडीको झूलाघाटमा पुगेर अन्त्य हुने कार्यक्रम छ । शनिवार नयाँशक्ति पार्टी, केन्द्रीय कार्यालयमा एक पत्रकार सम्मेलन आयोजना गरी यात्राबारे जानकारी गराइएको हो ।

डा. भट्टराईले भने, ‘म अर्थमन्त्री छँदा ०६५–६६ सालमा पहाडको विकासका लागि चिवाभञ्ज्याङदेखि झुलाघाटसम्म मध्य–पहाडै पहाड भएर जाने पुष्पलाल राजमार्गलाई राष्ट्रिय गौरवको आयोजनाका रूपमा अघि बढाएको थिएँ । त्यो निर्माण कहाँ पुग्यो, त्यो पनि हेर्न मन छ । थारु र मधेशीबाहेक नेपालमा मुख्य सात जातको मुख्य थलो यही मार्गमा पर्छ । यो मार्गमा यात्रा गर्दा नेपालको औसत बोध हुन्छ ।’

देश विकासको प्रतिफल भुइँ तहका जनतासम्म पुग्नुपर्ने बताउँदै डा.भट्टराईले भने, ‘लोकतन्त्र भनेको जनताबाट लिएर जनतालाई नै दिने व्यवस्था हो । विकासको प्रतिफल सबै वर्ग, जाति, क्षेत्रसम्म पुग्नुपर्छ । यो सरकार एक वर्ष पुग्दा जनतामा निराशा छाएको छ । यो चल्तेचलातेको राजनीतिले कहीँ पुगिँदैन । त्यसैले जनताको समस्या बुझेर नीतिनिर्माणमा सघाउन यो यात्राले मद्दत गर्छ ।’

‘असल राजनीति र समावेशी विकासका लागि जनसंवाद यात्रा’ नाम दिइएको उक्त यात्रामा लोकमार्गमा पर्ने मुख्य शहर र वस्तीहरूमा अन्तरक्रियामा र सभाहरू पनि आयोजना गरिने छन् । यात्रामा जनप्रतिनिधिहरु, स्थापित सामाजिक व्यक्तित्वहरु, विभिन्न राजनीतिक दलका प्रतिनिधिहरु तथा विभिन्न पक्षसँग स्थानीय समस्या र संघीयता कार्यान्वयनसम्बन्धी अन्तर्क्रिया एवम् प्रशिक्षण गरिने छन् ।

स्थानीय  विभिन्न उद्यमी, व्यवसायी र उपभोक्ता समूहहरुसँगको अन्तर्क्रिया हुनेछ । कृषि, पूर्वाधारसम्बन्धी अन्तर्क्रिया र श्रव्यदृश्य प्रस्तुतीकरण पनि गरिनेछ । यात्रामा स्थान विशेषअनुसार ससाना भेटघाट हुनेछन् । समावेशिता, सुशासन, सदाचार र समृद्धिबारेमा जनसंवाद गरिनेछ । यात्रामा पूर्व प्रधानमन्त्री भट्टराई सहित नयाँशक्ति पार्टीका नेताहरू सहभागी हुनेछन् ।

डा.भट्टराईले देश कांग्रेस र कम्युनिष्ट दुई धारमा विभक्त भएकाले यी दुई ध्रुवबाहेक तेस्रो शक्ति जरुरी रहेकाले आफूहरूले त्यसका लागि प्रयास गरेको बताए । यात्राको उद्देश्य पार्टीले अंगालेको वैकल्पिक विचार, असल राजनीतिलाई जनसमक्ष प्रसार गर्नु र जनताको सुझाव ग्रहण गर्नु रहेको सो पार्टीले जनाएको छ ।

पार्टी प्रचार विभाग प्रमुख विश्वदीप पाण्डेद्वारा जारी विज्ञप्तिका अनुसार, कार्यक्रमको मूल उद्देश्य नयाँ शक्ति पार्टी, नेपालद्वारा प्रस्तुत समावेशी समृद्धिको खाका र अवधारणा प्रष्टसँग आमजनतामा पु¥याउनु रहेको छ । संघीयता कार्यान्वयनका शिलशिलामा देखापरेका अकर्मण्यता र शिथिलताको अन्त्य गरी संघीयताको पक्षमा दृढतापूर्वक उभिन र त्यसका बारेमा विभिन्न स्थानका जनप्रतिनिधिहरु, स्थानीय तह र आम जनतालाई प्रशिक्षित गर्नु उक्त कार्यक्रम आयोजना गरिएको हो ।

विज्ञप्तिमा भनिएको छ, ‘देशको युवा पंक्तिसँग सिधा सम्बन्ध स्थापित गरी युवा शक्तिको विदेश पलायन रोक्न गम्भीर विमर्श गर्नु रहेको छ ।’