पशुपतिनाथमा विशेष पूजा गराउनेको आकर्षण बढ्याे

काठमाडौं, चैत ४ : पशुपतिनाथ मन्दिरमा ११ महिनापछि शुरु भएको विशेष पूजामा भक्तजनको आकर्षण बढ्न थालेको छ। गत वर्ष चैतदेखि रोकिएको विशेष पूजा यस वर्ष महाशिवरात्रिको दुई दिनअघि (फागुन २५ गते) देखि मात्र शुरु भएको थियो।

विशेष पूजा शुरु भएपछि सोमबार र शनिबार भक्तजनको भीड बढ्न थालेको छ। कोरोना जोखिमका कारण भारतीय भक्तजन नआए पनि नेपाली दर्शनार्थीले नै विशेष पूजा गराउन थालेका हुन्।

महाशिवरात्रिका दिन मात्र पशुपतिनाथ मन्दिरमा ३१ लाख १२ हजार ३ सयको विशेष पूजा भएको पशुपति क्षेत्र विकास कोषका कोषाध्यक्ष डा‍. मिलनकुमार थापाले बताए। महाशिवरात्रिका दिन ५ हजार १०० र ११ हजार रुपैयाँ गरी दुई किसिमका रसिद काटी विशेष पूजा गरिएको थियो।

५ हजार १०० को विशेष पूजा ३७५ र ११ हजार रुपैयाँको विशेष पूजा ११० जना भक्तजनले गरेको उनले सुनाए। ५ हजार १०० को पूजा गर्ने दुईजना कर्ता र ११ हजार रुपैयाँको पूजा गर्ने चारजना कर्तालाई महाशिवरात्रिका दिन पशुपतिनाथ मूल मन्दिरमा दर्शन गर्ने व्यवस्था गरिएको थियो । 

यही फागुन २५ गतेदेखि १ हजार १०० देखि २७ हजार रुपैयाँसम्मको विशेष पूजा रसिद काटेर गर्न थालिएको छ । पशुपतिनाथ मन्दिरमा १ हजार १०० देखि रु २५ लाखसम्मको विशेष पूजा हुने गरेको छ।

कोषले महाशिवरात्रिका अवसर पारेर स्वास्थ्य सुरक्षाका विधि अपनाउँदै विशेष पूजा खुला गरेको हो । कोषले विशेष पूजाको रसिद काटेर पूजा गराउने विधि छ। विशेष पूजाबाट कोषलाई वार्षिक ९ देखि १० करोड रुपैयाँसम्म आम्दानी हुने गरेको छ।

आर्थिक वर्ष २०७५/७६ मा विशेष पूजाबाट ९ करोड ४० लाख ९३ हजार १४५ आम्दानी भएको थियो । गत वर्ष चैतदेखि नै कोरोनाका कारण विशेष पूजा रोकिएको थियो । कोरोनाका कारण करीब नौ महिना मन्दिरसमेत बन्द भई विशेष पूजा रोकिँदा पनि ६ करोड १ लाख ८९ हजार ४७५ आय भएको कोषाध्यक्ष थापाले बताए।

कोरोना जोखिमका कारण यस वर्ष महाशिवरात्रिमा पनि पशुपतिनाथ मन्दिरमा कम भक्तजन आएका छन् । जसका कारण पशुपतिको महाशिवरात्रिका दिनको आयमा प्रभाव परेको कोषले जनाएको छ। गत वर्ष महाशिवरात्रिका दिन १० लाखभन्दा बढी भेटी उठेको थियो।

यस वर्ष भने ६ लाखको हाराहारीमा मात्र जम्मा भएको जनाइएको छ। महाशिवरात्रिको दिनदेखि पशुपतिनाथ मन्दिर साबिकअनुसार खुला भइसकेको छ । मन्दिर बिहान ५ देखि बेलुकी ७ बजेसम्म खुला हुन थालेको हो। गत वर्ष चैत ११ देखि बन्द रहेको मन्दिर नौ महिनापछि पुस १ गतेदेखि बिहान ६ देखि दिउँसो २ बजेसम्म मात्र खुला हुने गरेको थियो।

यसबीचमा पशुपतिनाथ मन्दिरको नित्य पूजा र भोगका समयमा भने करिब एक घण्टा मन्दिर बन्द हुने गरेको छ । महाशिवरात्रिका अवसरमा फागुन २७ गतेदेखि भने साबिकअनुसार नै मन्दिर खुला भइरहेको कोषले जनाएको छ।