कुखुरा भटाभट मर्न थालेपछि किसान चिन्तित     

इलाम, फागुन १३ : पछिल्लो समय कुखुरा मर्न थालेपछि जिल्लाका किसान चिन्तित बन्न थालेका छन् ।

एकै दिन एकै किसानका एक हजार हाराहारीमा कुखुरा मर्न थालेका छन् । पहिले कुखुरा झोक्राउने, हरियो र सेतो रङको दिसा गर्ने, चारो नखाने लक्षण देखिएको किसानहरूले बताएका छन्।

आइतबार र सोमबारमा १ हजार २ सय कुखुरा मरेको पोल्ट्री व्यवसायी विनोद पोखरेलले जनाए। एकैपटक धेरै कुखुरा मर्दा साढे ४ लाखभन्दा बढी क्षति बेहोर्नुपरेको उनको भनाइ छ।

पोल्ट्री व्यवसायी संघका अध्यक्ष दिनेश महतले लोकल २ सय ५० र कडकनाथ जातको १ सय कुखुरा मरेको जानकारी दिए। उनले कुखुरा मर्दा ३ लाख ८० हजारभन्दा बढी क्षति भएको बताए। भेटेरेनरी अस्पताल तथा पशु सेवा विज्ञ केन्द्र इलामले रानीखेतको खोप नलगाएका कारण कुखुरा मरेको जनाएको छ । किसानले भने रानीखेतको खोप लगाएको कुखुरासमेत मरेको जानकारी दिए।

सात दिनदेखि इलाम नगरपालिका क्षेत्रमा किसानले पालेको कुखुरा मरेको पशु प्राविधिक प्रकाश लुइँटेलले जानकारी दिए । ‘झोक्राउने, हरियो सेतो छेर्ने, चारो नखाने लक्षण देखिएपछि कुखुरा मर्न थालेका छन्,’ उनले भने, ‘कुखुरा बिरामी पर्न थालेको दुई÷तीन दिनमा फार्म नै रित्तिन थालेको छ ।’     
     
कुखुरा मर्न थालेपछि भेटेरेनरी अस्पताल तथा पशु सेवा विज्ञ केन्द्रले नमुना संकलन गरेर विराटनगरको प्रयोगशालाको पठाएको थियो । परीक्षण गर्दा कुखुरामा रानीखेतको भाइरस देखिएको डा. सञ्जय ढुंगानाले जानकारी दिए । ‘कतिपय किसानले रानीखेतको खोप नै लगाउँदैनन्, कसैले खोप लगाउने कसैले खोप नलगाउने भएपछि कुखुरामा रोग देखिएको हुनसक्छ,’ उनले भने, ‘खोप लगाउँदासम्म तापक्रम मिलाइएन भने त्यसको प्रभावकारिता नहुन सक्छ ।’