भागरथी बलात्कार–हत्याका अभियुक्त दिनेशलाई पाँच दिन हिरासतमा राख्न अनुमति

बैतडी, फागुन ५ : भागरथी भट्टको बलात्कार–हत्याका अभियुक्त दिनेश भट्टलाई  ५ दिन म्याद थप गरेर अनुसन्धान अगाडि बढाउन जिल्ला अदालत बैतडीले प्रहरीलाई अनुमति दिएको छ।

बुधबार जिल्ला अदालत बैतडीले हत्या आरोपी भट्टलाई ५ दिन म्याद थप गरेर अनुसन्धान गर्न अनुमति दिएको प्रदेश प्रहरी प्रमुख डीआईजी उत्तराज सुवेदीले जानकारी दिए।

बुधबार दिउँसो २ बजे जिल्ला प्रहरीले  पत्रकार सम्मेलन गरेर अभियुक्तलाई सार्वजनिक गरेको हो। घटनाको १३औँ दिनमा पक्राउ परेका अभियुक्त दिनेश पनि सनातन धर्म माध्यमिक विद्यालयमा पढ्थे ।

बैतडीको दोगडाकेदार गाउँपालिका–७ चडेपानीकी १७ वर्षीया  भागरथी भट्टको शव माघ २२ गते खोचलेक–चडेपानी ग्रामीण सडकखण्डको लवलेक जंगलमा सडकबाट १ सय मिटर तल झाडीमा फेला परेको थियो। 

सनातनधर्म माविमा कक्षा १२ मा अध्यनरत उनी २१ गते बिहान १० बजे विद्यालय गएकी थिइन्। त्यही दिन बेपत्ता भएकी उनको भोलिपल्ट शव भेटिएको थियो।