जनप्रतिनिधिले बिक्री गरे एम्बुलेन्स, फिर्ता गर्न स्थानीयको माग
मोरङको बेलबारी नगरपालिकाका जनप्रतिनिधिको मिलेमतोमा सामाजिक हितका लागि खरिद गरिएको एम्बुलेन्स बिक्री गरिएको छ ।
काठमाडौं, माघ २३ : मोरङको बेलबारी नगरपालिकाका जनप्रतिनिधिको मिलेमतोमा सामाजिक हितका लागि खरिद गरिएको एम्बुलेन्स बिक्री गरिएको छ । लायन्स क्लब अफ बेलबारीले सामाजिक हितका लागि खरिद गरेको एम्बुलेन्स जनप्रतिनिधिलगायतको मिलेमतोमा बिक्री गरिएको हो ।
लायन्स क्लब अफ बेलबारीका अध्यक्ष खेमप्रसाद गौतमले जनप्रतिनिधिका कारण लज्जित हुनुपरेको बताए । लायन्स क्लब बेलबारीले सन् २०११ मा सांसद विकास कोषको ३ लाख र क्लबका अन्य सदस्यबाट रकम संकलन गरी ११ लाखमा को१च ५७९४ नम्बरको टाटा सुमो सेतो रङको एम्बुलेन्स खरिद गरेको थियो ।
तर वडा नं–३ का अध्यक्ष योगेन्द्र सुवेदीको संयोजकत्वमा बिक्री समिति बनाएर सो एम्बुलेन्स बिक्री गरियो । एम्बुलेन्स बिक्री भएपछि स्थानीय जनप्रतिनिधिप्रति आक्रोशित भएका छन् । उनीहरुले एम्बुलेन्स फिर्ता गर्न माग गर्दै आएका छन् ।
गरिब तथा असहायको सामाजिक कार्यका लागि खरिद गरिएको एम्बुलेन्स अविलम्ब क्लबलाई फर्काउने व्यवस्थाका लागि सबैसँग अध्यक्ष गौतमले आग्रह गरे ।–रासस
