उच्च जोखिममा रहेको बस्ती सार्न जग्गाको खोजी

म्याग्दी, असोज ४ : पहिरोको उच्च जोखिममा रहेको म्याग्दीको रघुगङ्गा गाउँपालिका–८ चौरखानीको बस्ती स्थानान्तरणका लागि जग्गाको खोजी सुरु भएको छ।

भिरालो पाखोमा रहेको चौरखानीमा पहिरोको जोखिम बढेपछि सुरक्षित ठाउँमा स्थानान्तरणका लागि गाउँपालिकाले जग्गाको खोजी थालेको हो। गाउँको फेदीदेखि शिरसम्मको जमिन पहिरोले छियाछिया बनाएकाले थप क्षति हुन नदिन बस्ती स्थानान्तरण गर्न लागिएको गाउँपालिकाका अध्यक्ष भवबहादुर भण्डारीले बताए।

अध्यक्ष भण्डारीले भने, 'करिब डेढ दशकदेखिको चौरखानीको पहिरो यो वर्ष थप सक्रिय भएको छ। नियन्त्रण सम्भव नभएपछि बस्तीनै सार्नका लागि पहल गरेका हौँ।'

स्थानीय वासिन्दाले रोजेको ठाउँमा भूगर्भविद्को टोलीले अध्ययन गरेर उपयुक्त भएको सिफारिस गरेको आधारमा स्थानान्तरणका लागि छनोट गरिने प्रमुख प्रशासकीय अधिकृत अमृत सुवेदीले बताए। उनका अनुसार पहिरोबाट विस्थापितलाई घर स्थानान्तरणका लागि सङ्घीय सरकारले एक लाख उपलब्ध गराउने नीतिगत व्यवस्था गरेको छ।

अन्यत्र जग्गा नभएकाका लागि निजी जग्गा नपाए सङ्घीय सरकारको मन्त्रिपरिषद्बाट निर्णय गराएर सार्वजनिक जग्गा उपलब्ध गराउने व्यवस्था छ।

चौरखानीका ५२ मध्ये अहिले ३० परिवारको बसोबास छ। आधाले घर छोडेर बेनी, पोखरा, काठमाडौंलगायतका ठाउँमा गएर बसेका छन्। गाउँको बीचमा ठाडो चिरा पारेको पहिरोका चौरखानीमा एउटा सामुदायिक भवन र एउटा घर भत्किएको छ।

गाउँपालिकाको पाँच लाख र स्थानीयको नौ लाख खर्चेर दुई वर्षअघि निर्माण गरिएको सामुदायिक भवन चिरा परेर भत्किएको छ। नरप्रसाद छन्त्यालको घर भत्किएको र अन्य ११ वटा घरको पर्खाल चर्किएर जोखिममा परेको वडाध्यक्ष गमान छन्त्यालले बताए।

थमबहादुर छन्त्याल, उद्दिमबहादुर छन्त्याल, चन्द्रबहादुर छन्त्याल, रैमान छन्त्याल, रामप्रसाद छन्त्याल, गमबहादुर छन्त्याल, हर्कमान छन्त्याल, नरमान छन्त्याल, दलप्रसाद विक र पूर्णमान छन्त्यालको घरको पर्खाल चर्किएर ढल्किएको छ। त्यस्तै, भिङखानी भूमे युवा क्लबको खेलमैदान भत्किएको छ।

दुई किलोमिटर तल रघुगङ्गा नदीको किनारबाट सुरु भएको पहिरो चौरखानीको शिरमा रहेको पहाडको फेदीमा पुगेको छ। पहिरोले गाउँलाई चिरेर दुई भागमा विभाजन गरेको स्थानीय रामप्रसाद छन्त्यालले बताए। २०६४ मा सुरु भएको पहिरो ग्याबिन पर्खाल र भल व्यवस्थापन गरेपछि केही वर्ष रोकिएको थियो।

यो वर्ष अत्यधिक वर्षाका कारण पहिरो सक्रिय भएपछि जोखिम बढेको हो। खेतबारी र जङ्गल चिराचिरा परेको छ। घरको पर्खाल चर्किएर ढल्किएको स्थानीय थममाया छन्त्यालले बताउनुभयो । भित्रभित्रै जमिन बगरिहेको उनले बताए। (रासस)