मिडिया राष्ट्रिय हितको दायित्वबाट टाढा रहन सक्दैन : अध्यक्ष तिमिल्सिना

काठमाडौं, भदौ ३१ : राष्ट्रियसभाका अध्यक्ष गणेशप्रसाद तिमिल्सिनाले मिडियाले आफ्नो अधिकार उपयोग गर्दा अरूको अधिकार हनन गर्न नहुने बताएका छन्। उनले मिडिया राष्ट्रिय हितको आफ्नो दायित्वबाट टाढा रहन नसक्नेसमेत बताएका छन्।

मिडिया एक्सन नेपालको तालीमको समापन सत्रमा भिडियो कन्फ्रेन्समार्फत शुभकामना दिँदै अध्यक्ष तिमिल्सिनाले  मिडिया एक्सन नेपालले भ्रामक समाचारसम्बन्धी शोध पुस्तक प्रकाशन गरेकामा आभार व्यक्त गरे। नेपाल पत्रकार महासंघका अध्यक्ष गोविन्द आचार्यले सञ्चारमाध्यमले सत्यतथ्य सूचना सम्प्रेषण गर्नुपर्ने र गलत सूचना सम्प्रेषण गरेमा सञ्चारमाध्यमप्रति जनताको विश्वास गुम्ने बताए।

सञ्चारविज्ञ एवम् मिडिया एक्सन नेपालका अध्यक्ष लक्ष्मणदत्त पन्तले तालीममा सहभागी पत्रकारले पत्रकारिताका नैतिक मानक, भ्रामक र मिथ्या समाचार, सूचना महामारीको रोकथामका सूचक, वैदेशिक नीति तथा मिडिया, तस्वीरको आधिकारिकता, लैङ्गिक संवेदनशील पत्रकारितालगायत विषयमा स्वदेशी तथा विदेशी विज्ञले प्रशिक्षण दिएको बताए। तालीममा झापा, इलाम र पाँचथरका ३० पत्रकारको सहभागिता रहेको थियो।