बागलुङमा पहिरोले पाँच घर पुरिँदा एक जना बेपत्ता

बागलुङ, भदौ २९ : अविरल वर्षाका कारण आएको पहिरोले बागलुङको जैमिनी नगरपालिका–१ कुश्मिशेरास्थित टुनीबोटमा आज बिहान पाँच घर पुरिएको छ भने एक जना बेपत्ता भएका छन्।

पहिरोले घर पुरिँदा ६१ वर्षीय हरिकृष्ण पौडेल बेपत्ता भएका हुन्।  परिवारका अन्य पाँच सदस्य सकुशल रहेको जिल्ला प्रहरी कार्यालय बागलुङका प्रहरी निरीक्षक हेम केसीले बताए।

पहिरोले पवित्रादेवी शर्मा, इन्द्र शर्मा, रत्नबहादुर क्षत्री र तारादेवी क्षत्रीको घरमा पूर्णरूपमा क्षति पुर्‍याएको छ। घटनास्थलमा तत्कालै नेपाली सेना र प्रहरी परिचालन गरी उद्धारको काम भइरहेको प्रहरीले जनाएको छ।

यसअघि आइतबार पनि पहिरोले बागलुङमा धनजनको क्षति पुगेको थियो। तीन घर पुरिँदा दुई जनाको मृत्यु भएको थियो भने एक जना घाइते भएका थिए।