कुलेखानी भरिएर खतराको संकेत, बाँध खोलिँदै, वाग्मती नदी आसपासका बासिन्दालाई सचेत रहन आग्रह

हेटौडा, असार ३० : अत्याधिक पानी परेपछि देशकै सबैभन्दा ठूलो मानव निर्मित ताल भनेर चिनिने कुलेखानी ड्याम इन्द्रसरोवर भरिएर खतराको सङ्केत देखिएको छ। खतराको संकेत देखिएपछि ड्यामको ढोका खोल्न लागिएको छ।

कुलेखानीको ड्यामको ढोका खोलीने भएकाले वाग्मती नदी आसपासका बासिन्दालाई सचेत रहन आग्रह गरिएको छ। मकवानपुरको भिमफेदी, इन्द्रसरोवर, वाग्मती गाउँपालिका, रौतहटको नुनथर, चन्द्रपुर, क्यान्टिन, सर्लाहीको विभिन्न क्षेत्र, सिन्धुलीको हरिहरपुर गढी क्षेत्र आसपासका नागरिकलाई सचेत रहन आग्रह गरिएको हो।

कुलेखानीको पानी कुलेखानी खोला हुँदै वाग्मती खोला भएर बग्ने भएकाले वाग्मती आसपासका नागरिकलाई सचेत रहन आग्रह गरिएको मकवानपुरका प्रमुख जिल्ला अधिकारी आसमान तामाङले बताए।

पहिलो र दोस्रो गरी ९२ मेगावाट क्षमताको कुलेखानी जलविद्युत् आयोजनाको जलाशय इन्द्रसरोवरको ड्याम भरिएपछि पानी बाहिर निकालेर जोखिम कम गर्ने तयारी थालिएको हो।

मकवानपुरको अन्यत्र वर्षा रोकिए पनि उत्तरी मकवानपुरको थाहा नगर तथा इन्द्रसरोवर आसपास अत्यधिक पानी परिरहेको कारण कुलेखानीको क्षमताभन्दा बढी पानी भरिएको छ। जिल्ला सुरक्षा समिति मकवापनुरको बैठकले इन्द्रसरोवरको ड्याम केही खोलेर भए पनि जोखिम कम गर्ने तयारी थालेको प्रजिअ तामाङले बताए।

कुलेखानीमा क्षमताभन्दा बढी रहेको पानी निकाल्दासमेत विभिन्न चार वटा जिल्लाका नदीनाला आसपासका क्षेत्र जोखिममा पर्ने हुँदा सचेत र सजक रहनसमेत आग्रह गरिएको उनको भनाइ छ। त्यहाँबाट बग्ने पानीले बाढीको खतरा हुनसक्ने जनाएको छ।

कुलेखानीको क्षमता एक हजार पाँच सय ३० घनमिटर रहेको छ। बिहान ६ बजेसम्ममा एक हजार पाँच सय २५ दशमलव चार घनमिटर पानी भरिइसकेको छ।

समुद्री सतहबाट एक सय १४ मिटर उचाइमा ड्याम रहेको छ। तीन सय मिटर चौडाइ र सात किलोमिटर लम्बाइको जलाशयमा एक हजार पाँच सय ३० घनमिटर पानी अट्ने क्षमता छ। ड्याम ३७ वर्षअघि निर्माण गरिएको हो।  (रासस)