सुदूरपश्चिमी पहाडमा भूकम्पको धक्का

बैतडी, चैत २६ : सुदूरपश्चिमी पहाडमा आज बिहान भूकम्पको धक्का महसुुस गरिएको छ।

मंगलबार बिहान ८ः३७ बजे गएको भूकम्पको धक्का बैतडी, दार्चुला र बझाङमा महसुस गरिएको हो।  

भूकम्प मापन केन्द्र सुर्खेतका प्राविधिक सहायक तीर्थराज दहालका अनुसार बैतडी र दार्चुलाको सीमाक्षेत्र आसपास केन्द्रविन्दु भएर ३ दशमलव ६ रिक्टर स्केलको परकम्प गएको हो।  

यसअघि चैत ४ गते पनि भारत र चीनको सीमाआसपास दार्चुलाको लिपुलेक केन्द्रविन्दु भएर लगातार तीन पटक परकम्प गएको थियो।

गोरखा केन्द्रविन्दु भएर गएको भूकम्पपश्चात् सुदूरपश्चिममा पनि बेलाबेलामा भूकम्पको परकम्प जाने गरेको भूकम्प मापन केन्द्रले जनाएको छ।