महोत्तरीको जलेश्वरमा पाँच दिनका लागि निषेधाज्ञा जारी

जलेश्वर, साउन १७ : समुदायस्तरमा नै कारोना महामारी फैलिन थालेपछि महोत्तरीको सदरमुकाम जलेश्वरमा पाँच दिनका लागि निषेधाज्ञा जारी गरिएको छ। 

जिल्ला दैवी प्रकोप समितिले एक सूचना जारी गर्दै शनिबारदेखि लागू हुने गरी पाँच दिनका लागि जलेश्वरमा निषेधाज्ञा जारी गरेको हो।

जलेश्वरको पूर्वमा भार्गवसर मन्दिर, पश्चिममा रामनन्दन विशेश्वर महेन्द्र क्याम्पस, उत्तरमा रणभीम गण र दक्षिणमा रातोपुल यति चारकिलाको क्षेत्रमा पाँच दिनसम्मका लागि निषेधाज्ञा जारी गरिएको प्रमुख जिल्ला अधिकारी कृष्णबहादुर कटुवालले जानकारी दिए।

त्यसैगरी जिल्लाको महोत्तरी गाउँपालिका–३ र ५ मा पनि पाँच दिनको लागि निषेधाज्ञा जारी गरिएको  विज्ञप्तिमा उल्लेख रहेको छ।  

एक साताअघि जिल्लाको महोत्तरी गाउँपालिका–३ बस्ने एक ६४ वर्षीय पुरुषको कोरोनाको कारण मृत्यु भएपछि उनको शव व्यवस्थापनमा खटिएका तथा आइसोलेसन व्यवस्थापनमा खटिएका १० जना नेपाली सेना, जलेश्वरका एक सामुदायिक विद्यालयका प्रधानाध्यापक, जलेश्वर नगरपालिकाका कर्मचारी र मृतकका परिवारजनमा बिहीबार कोरोनाको सङ्क्रमण देखिएपछि जलेश्वर नगरपालिका र महोत्तरी गाउँपालिकामा गए रातिदेखि निषेधाज्ञा जारी गरिएको हो। रासस