सप्तरीमा एकै परिवारका चारसहित सात जनामा कोरोना संक्रमण पुष्टि

काठमाडौं, साउन ९ : सप्तरीको राजविराजका थप सात जनामा कोरोना संक्रमण पुष्टि भएको छ। संक्रमित सात मध्ये चार जना एकै परिवारका सदस्य रहेका छन्।

राजविराजमा चिया पसल सञ्चालन गर्दै आएका एउटै परिवारका ४ जनामा कोरोना संक्रमण पुष्टि भएको हो। संक्रमितमध्ये तीन पुरुष र एक महिला रहेकी छन्। 

जिल्ला जनस्वास्थ्य कार्यालय सप्तरीका अनुसार राजविराज ६ की एक महिला, ९ की एक महिला र  ७ का एक पुरुषमा पनि संक्रमण पुष्टि भएको हो। 

चिया पसल सञ्चालक गत साउन १ गते कोरोना संक्रमणबाट मृत्यु भएका ७३ वर्षीय व्यापारीको छिमेकी हुन्।