सरकारको प्रतिबन्ध आपराधिक गतिविधिमाथि हो: प्रवक्ता श्रेष्ठ 

गोरखा, चैत ९: नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठले विप्लव समूहमाथि सरकारले प्रतिबन्ध लगाएको नभई संविधान विरोधी गतिविधिलाई मात्र नियन्त्रण गरेको बताएका छन्। 

गोरखामा शनिबार पत्रकारसँग कुराकानी गर्दै प्रवक्ता श्रेष्ठले सरकारले विप्लव समूहलाई वार्ताका लागि आह्वान गरेको भन्दै संविधान कार्यान्वयन हुन नदिने उसको क्रियाकलाप नियन्त्रण गर्नु सरकारको दायित्व भएको बताएका हुन्।   'प्रधानमन्त्रीले वार्तामा आउन आह्वान गर्नुभएको कुरा सञ्चारमाध्यममा बाहिर आइरहेकै छ', उनले भने, 'सरकारको आधिकारिक निर्णयमा पनि प्रतिबन्ध भनेर भनिएको छैन।' 

उनले विप्लव समूहले जुनजुन संविधान विरोधी क्रियाकलाप गरिरहेकाले नियन्त्रणमा लिने काम मात्र सरकारले गरेको बताए।  'बाहिर चर्चामा आए जस्तो सरकारले वार्ता गर्न चाहेन भन्ने कुरा सत्य होइनन्', प्रवक्ता श्रेष्ठले भने, 'सरकार वार्ता गर्न पनि तयार छ र संविधान विरोधी गतिविधि नियन्त्रण गर्न पनि।' 

प्रवक्ता श्रेष्ठले विप्लवको लक्ष्य राजनीतिक भए पनि उसको गतिविधि राजनीतिक हुन नसकेको टिप्पणी गरे। 'शान्तिपूर्ण बाटोबाटै समाजवादमा पुग्ने लक्ष्य हासिल गर्न सकिन्छ,' उनले भने, 'तर उहाँहरु शान्तिसुरक्षामा खलल पुर्‍याउने, समाजमा अराजकता सिर्जना गर्ने उल्टो बाटो तिर लाग्नुभएको छ।'

 प्रवक्ता श्रेष्ठले विप्लवको गतिविधिले समाजवादमा पुग्ने बाटोलाई खलबल्याउने काम मात्र गरेको आरोपसमेत लगाए। रासस