नवग्रह मन्दिरको संरक्षण एवं प्रबर्द्वनमा कांग्रेस सचेतक राईले गराए संसदको ध्यानाकर्षण

काठमाडौं, भदौं ३० : नेपाली कांग्रेसका सचेतक निश्कल राईले स्याङ्जाको अर्जुनचौपारी गाउँपालिकामा रहेको नेपालकै पहिलो नवग्रह मन्दिर धार्मिक आस्था, पर्यटन र स्थानीय अर्थतन्त्रको महत्वपूर्ण आधार बनेको भन्दै संरक्षण एवं प्रबर्द्वनमा सरकारले ध्यान दिनुपर्ने बताएका छन् । 

आजको प्रतिनिधि सभा बैठकको शुन्य समयमा बोल्दै राईले नेपालकै पहिलो नवग्रह मन्दिर नेपालकै धार्मिक आस्थाको केन्द्र भएतापनि ठूलो सम्भावना हुँदाहुँदै पनि यसको आवश्यक पूर्वाधार विकास र राष्ट्रिय–अन्तर्राष्ट्रिय प्रचार–प्रसार हुन नसकेको भन्दै यसको आवश्यक पूर्वाधार विकास र राष्ट्रिय–अन्तर्राष्ट्रिय प्रचार–प्रसार गर्नुपर्नेमा जोड दिए । उनले नवग्रह मन्दिरले स्थानीय व्यापार, रोजगारी र आयआर्जनमा उल्लेखनीय योगदान पुर्‍याइरहेको जानकारी समेत गराए । 

सांसद राईले धार्मिक पर्यटनमार्फत स्थानीय अर्थतन्त्रलाई थप सुदृढ बनाउन आवश्यक बजेट र प्रचारप्रसारका लागि विशेष कार्यक्रम सञ्चालन गर्न नेपाल सरकारको ध्यानाकर्षण गराएका हुन् । 

कांग्रेसले आफ्नो पार्टीका सांसद नभएका जिल्लाका समस्यालाई संसदमा उठाउन र समन्वय गर्नका लागि सांसदहरुलाई थप जिल्लाको जिम्मेबारी दिएको थियो । उक्त जिम्मेवारीमा स्याङ्जा जिल्लाको जिम्मेवारी पाएका राईले स्याङ्जाको धार्मिक एवं पर्यटकीय गन्तब्य नवग्रह मन्दिरको बिषयमा शून्य समयमा धारणा राखेका हुन् । 

स्याङ्जाको अर्जुनचौपारी गाउँपालिका–१ जलबराह धार्मिक बन परिसरमा पञ्चकन्या मन्दिर परिसरमा रहेको मन्दिर छोटो समयमै जिल्लाको आकर्षणको केन्द्र बनेको छ । मन्दिर निर्माणसँगै आसपासको क्षेत्रमा धार्मिक पर्यटकको आगमन बढेको छ भने स्थानीय व्यापार, होटल, यातायात तथा अन्य व्यवसायमा समेत चहलपहल बढेको छ ।