नदीजन्य पदार्थ उत्खननसम्बन्धी कानुन संशोधन गर्न सांसद तामाङको माग
‘बर्खे महिनाहरूमा कानुन र नियमअनुसार खोलाबाट गिटी, बालुवा र ढुंगा निकाल्न निषेधित छ । तर तस्करहरूले एकै रातमा लाखौँ–करोडौँको बालुवा राज्यलाई एक रुपैयाँ कर नतिरिकन तस्करी गर्छन्,’ उनले भनिन्।
काठमाडौं, साउन २५ : राष्ट्रिय स्वतन्त्र पार्टीकी सांसद आशिका तामाङले नदीजन्य पदार्थ गिटी, बालुवा र ढुंगा उत्खनन तथा क्रसर उद्योग सञ्चालनसम्बन्धी कानुनलाई समयअनुकूल संशोधन गर्न सरकारसँग माग गरेकी छन् ।
सोमबार बसेको प्रतिनिधिसभाको बैठकमा बोल्दै सांसद तामाङले बर्खायाममा कानुनअनुसार खोलाबाट गिटी, बालुवा र ढुंगा निकाल्न निषेध गरिए पनि तस्करी नरोकिएको बताइन्।
‘बर्खे महिनाहरूमा कानुन र नियमअनुसार खोलाबाट गिटी, बालुवा र ढुंगा निकाल्न निषेधित छ । तर तस्करहरूले एकै रातमा लाखौँ–करोडौँको बालुवा राज्यलाई एक रुपैयाँ कर नतिरिकन तस्करी गर्छन्,’ उनले भनिन्।
यो समस्या आफ्नो जिल्ला धादिङसहित नेपालका अधिकांश नदीमा जटिल बन्दै गएको उनले बताइन्। समस्या नदीजन्य पदार्थको उत्खननमा मात्र नभई कानुनी प्रक्रिया पनि जटिल रहेको उनको भनाइ छ।
‘मेरो मनसाय ढुंगा, गिटी र बालुवा निकाल्न पाउनु हुँदैन भन्ने पटक्कै होइन। तर यसको सही व्यवस्थापनमा कानुन बाधक बन्नु हुँदैन भन्ने चाहिँ हो,’ उनले भनिन्।
वातावरण संरक्षण र आर्थिक विकासबीच सन्तुलन कायम हुने गरी विद्यमान कानुनी व्यवस्था संशोधन गर्नुपर्नेमा उनले जोड दिइन्।
