भयरहित वातावरणमा मतदान गरौँ, कांग्रेस सबैभन्दा ठुलो दल बन्दैछ : विश्वप्रकाश शर्मा
‘बिहानै मतदान गरियो। यो लोकतन्त्रको सबैभन्दा सुन्दर अभ्यास हो। म अपेक्षा गर्दछु यो अभ्यासमा जति पनि मतदाता हुनुहुन्छ सम्भव भएसम्म आफ्नो विवेकलाई प्रयोग गर्नुहुनेछ। आवेगमुक्त भएर मतदाताले अबको देशको समाधानका लागि आफ्नो निर्णय दिनुहुनेछ,’ उनले भनेका छन्।
काठमाडौं, फागुन २१ : नेपाली कांग्रेसका उपसभापति विश्वप्रकाश शर्माले मतदान गरेका छन्। पूर्व सांसदसमेत रहेका शर्माले झापा क्षेत्र नम्बर १ मेचीनगर ९ कविशिरोमणि माविको मतदान केन्द्रमा बिहान ७ बजे मतदान गरेका हुन्।
उनले सबैलाई भयरहित वातावरणमा मतदान गर्न आग्रह समेत गरेका छन्।
‘बिहानै मतदान गरियो। यो लोकतन्त्रको सबैभन्दा सुन्दर अभ्यास हो। म अपेक्षा गर्दछु यो अभ्यासमा जति पनि मतदाता हुनुहुन्छ सम्भव भएसम्म आफ्नो विवेकलाई प्रयोग गर्नुहुनेछ। आवेगमुक्त भएर मतदाताले अबको देशको समाधानका लागि आफ्नो निर्णय दिनुहुनेछ,’ उनले भनेका छन्।
कांग्रेसका केन्द्रीय निर्वाचन परिचालन समितिका संयोजकसमेत रहेका उपसभापति शर्माले पार्टीको माहौल राम्रो रहेको प्रतिक्रिया दिएका छन्।
‘म नेपाली कांग्रेस पार्टीको एउटा प्रतिनिधिको रूपमा अहिले मतदान गरिरहँदै गर्दा निश्चय नै नेपाली कांग्रेस पार्टीको चुनाव चिन्ह रूखमा मतदान गरेको छु। र अपेक्षा गर्दछु नेपाली कांग्रेस पार्टी सबैभन्दा ठुलो दलका रूपमा निर्वाचनबाट विजयी हुँदैछ,’ उनले भने।
‘निर्वाचन अभियानका क्रममा करिब ४०—४५ जिल्ला सातै ओटा प्रदेशका सुदूरपश्चिमको डोल्पादेखि दिएर सुदूर पूर्वको सोलु पाँचथरसम्म मनाङदेखि लिएर मधेसको महोत्तरीसम्म पुगिरहँदै गर्दा नेपाली कांग्रेसको पक्षमा माहौल देखिएको छ। यो अभ्यासमा कहीँ पनि देशभरि आवेग र उत्तेजना बेगर सबैलाई मतदान गर्नलाई राजनीतिक दलहरूलाई सद्भावपूर्ण वातावरणमा भयरहित वातावरणमा सहयोग गर्नमा लागि म अपिल गर्न चाहन्छु,’ कांग्रेसको माहौलबारे उनले थपे।
