बाँकी रहेका कानुन निर्माण प्रक्रियालाई तीव्रता दिन आवश्यक छ : विमला घिमिरे

काठमाडौं, फागुन १३ : राष्ट्रिय सभा उपाध्यक्ष विमला घिमिरेले ६ वर्षे राजनीतिक कार्यअनुभव पूरा गर्न लाग्दा कानुन निर्माण र संसद सञ्चालन व्यवस्थापनबारे महत्वपूर्ण अनुभव हासिल गरेको बताएकी छन्।

फागुन २० गते राष्ट्रिय सभाबाट आफ्नो दुई वर्षे कार्यकाल सकिन लागेकै सन्दर्भमा आयोजित पत्रकार सम्मेलनमा बोल्दै उनले राष्ट्रिय सभामा काम गर्दाको अनुभव साझा गरेकी हुन्।

उनले गरिमामय सदनमा प्रवेश गरेपछि राष्ट्रिय सभालाई अनुभवी र विज्ञहरूको सभा भनिने भएकाले आफूले जिम्मेवार र संयमित ढंगले अभिव्यक्ति दिने प्रयास गरेको उल्लेख गरिन्।

‘कानुन निर्माणको प्रक्रिया र संसद सञ्चालनको व्यवस्थापनको सन्दर्भको अनुभव मैले लिएको छु। मैले व्यक्तिगत र सामुहिक हिसावले दुई प्रकारका कामहरु गरेको छु। गरिमामय सदनमा आइसकेपछि अनुभवी र विज्ञको सभा भन्छन् राष्ट्रिय सभालाई,’ उनले भनिन्, ‘खासगरी राष्ट्र, राष्ट्रियता र संघीयताप्रति बढी उत्तरदायी भएर काम गर्ने संस्थामा म आइरहँदाखेरि निश्चित कुरा मात्र बोल्नुपर्छ भन्ने लाग्यो । आफूले जिम्मेवार र संयमित ढंगले अभिव्यक्ति दिने प्रयास सधैं गरे ।’

उपाध्यक्ष घिमिरेले आफ्नो कार्यकालमा व्यक्तिगत तथा सामूहिक रूपमा दुई प्रकारका काम गरेको बताउँदै कानुन निर्माण प्रक्रियालाई अझ प्रभावकारी बनाउनुपर्ने आवश्यकता औंल्याइन्। उनले राष्ट्रिय सभामा हाल ३८ भन्दा बढी विधेयक दर्ता भएको समेत जानकारी दिइन्।

उनले बाँकी रहेका कानुनहरूको निर्माण प्रक्रियालाई तीव्रता दिनुपर्नेमा जोड दिँदै जनतासँग प्रत्यक्ष सरोकार राख्ने सेवा प्रवाह तथा मौलिक अधिकारसम्बन्धी कानुनहरूलाई सरकारले यथाशीघ्र सदनमा प्रस्तुत गरी छलफलमार्फत छिटोछरितो रूपमा पारित गर्नुपर्ने बताइन्।

‘राष्ट्रिय सभामा अहिले ३८ वटा भन्दा बढी विधेयकहरु दर्ता भएको देखिन्छ। अब जुन बाँकी रहेका कानुनहरु निर्माण प्रक्रियालाई गति दिनुपर्छ। जनतासँग सेवा प्रवाह, मौलिक अधिकार सम्बन्धी जति पनि कानुन छन् तिनीहरुलाई जतिसक्दो छिटो सरकारले सदनमा ल्याएर छलफल गराएर छिटो छरितो कानुन निर्माण गर्ने कुरामा हामी जानुपर्छ,’ उनले भनिन्।