गौरको घटना रोक्न प्रशासनको प्रयास जारी, झडप हुने क्षेत्रमा थप सेना परिचालन
कर्फ्यूका बाबजुत पनि रौतहटको गौरका भित्री भागमा आगजनी हुने क्रम रोकिएको छैन। जिल्ला प्रशासन कार्यालयबाट कर्फ्यू लगाएर नेपाली सेनासमेत परिचालन गर्दा पनि आगजनीका घटना नरोकिएको देखिएको छ।
रौतहट, फागुन ९ : रौतहट सदरमुकाम गौर नगरपालिकाको घटना रोक्न स्थानीय प्रशासनले प्रयास गरिरहेको छ।
गौरलगायतको क्षेत्रमा अनिश्चितकालिन कर्फ्यू लगाएतर सुरक्षाकर्मी परिचालन गरिएको छ।
कर्फ्यूका बाबजुत पनि रौतहटको गौरका भित्री भागमा आगजनी हुने क्रम रोकिएको छैन। जिल्ला प्रशासन कार्यालयबाट कर्फ्यू लगाएर नेपाली सेनासमेत परिचालन गर्दा पनि आगजनीका घटना नरोकिएको देखिएको छ।
गौरको मुख्य सडक शान्त देखिए पनि भित्रि क्षेत्रको अवस्था अझै तनावग्रस्त छ। हालसम्म आधा दर्जन सवारीमा क्षति पुगेको बताइएको छ।
जिल्ला प्रशासन रौतहटले पूर्वतर्फ मुडबलवा गेट, पश्चिमतर्फ लालबकैया बाँध, उत्तरतर्फ बम नहर र दक्षिणतर्फ गौर भन्सार कार्यालयमा कर्फ्यू जारी गरेको छ।
गौर नगरपालिका–६ स्थित सनगढा गाउँमा दुई समुदायबीच भएको झडपले उग्र रूप लिएपछि तनाव सुरु भएको हो । मुस्लिम समुदाय मस्जिदमा प्रार्थना गरिरहेका बेला हिन्दु समुदायले बाजा बजाएको भन्दै विवाद सुरु भएको थियो।
