कास्कीकोटमा अन्तर्राष्ट्रियस्तरको लक्जरी रिसोर्ट हिमालयन हाइडअवे 

पोखरा, माघ २७ : पोखराको पर्यटन नक्सामा नयाँ आयाम थप्दै कास्कीकोटमा अवस्थित हिमालयन हाइडअवे रिसोर्ट पोखरा, द सेन्टारा कलेक्सनले औपचारिक रूपमा सेवा सुरु गरेको छ।

पोखरामा पहिलो पटक अन्तर्राष्ट्रिय थाई लक्जरी आतिथ्य ब्रान्डको प्रवेशसँगै यस रिसोर्टले लेकसाइड केन्द्रित पर्यटनलाई पहाडी र ग्रामीण गन्तव्यतर्फ विस्तार गर्ने अपेक्षा गरिएको छ।

भव्य उद्घाटन समारोहमा पर्यटन तथा आतिथ्य क्षेत्रका वरिष्ठ नेतृत्व, उद्योग साझेदार, कूटनीतिक प्रतिनिधि र सञ्चारकर्मीहरूको उल्लेखनीय उपस्थिति रहेको थियो। समारोहमा रिसोर्टका रिसोर्ट अवधारणा निर्माता तथा सञ्चालक रोबर्ट की, सेन्टारा होटल्स एण्ड रिसोर्ट्सका प्रमुख सञ्चालन अधिकृत माइकल हेन्स्लर, गण्डकी प्रदेश प्रमुख नेपाल पर्यटन बोर्ड मणि राज लामिछानेले नेपालमा प्रिमियम पर्यटन विस्तारको सम्भावनाप्रति विश्वास व्यक्त गरे।

वक्ताहरूले नेपाल अन्तर्राष्ट्रिय बजारमा उच्चस्तरीय गन्तव्यका रूपमा उभिँदै गएको उल्लेख गर्दै नयाँ लगानीले स्थानीय रोजगारी, सेवा गुणस्तर र क्षेत्रीय पर्यटन विविधीकरणमा योगदान पुर्‍याउने बताए।

पोखरा महानगरदेखि करिब ३५ मिनेटको दूरीमा रहेको कास्कीकोटको पहाडी भूभागमा फैलिएको यो रिसोर्टबाट अन्नपूर्ण हिमशृंखला, माछापुच्छ्रे (फिसटेल) र वरपरका उपत्यकाको अवरोधविहीन दृश्य अवलोकन गर्न सकिन्छ। ४२ वटा कोठा, सुइट र भिल्ला समेटिएको रिसोर्टमा आधुनिक सुविधासँगै नेपाली वास्तुकला र थाई–प्रेरित सौन्दर्यको संयोजन गरिएको छ।

यहाँ अन्तर्राष्ट्रिय तथा स्थानीय परिकार प्रस्तुत गर्ने भोजनालय, बार र लाउन्ज, रमणीय टी–हाउस, खुला पौडी पोखरी, फिटनेस सेन्टर र ‘सेन्स बाइ स्पा सेन्भारे’मार्फत थाई–प्रेरित उपचार, योग र वेलनेस सेवाहरू उपलब्ध छन्।

उद्घाटन समारोहमा नेपाली सांस्कृतिक झल्को दिने परम्परागत प्रस्तुतिहरू समावेश गरिएको थियो, जसले स्थानीय पहिचान र अन्तर्राष्ट्रिय आतिथ्य संस्कृतिबीचको समन्वयलाई उजागर गर्‍यो। रिसोर्ट व्यवस्थापनका अनुसार यहाँ बस्ने पाहुनाहरूले केवल विलासिता मात्र होइन, स्थानीय जीवनशैली, संस्कृति र प्रकृतिसँग प्रत्यक्ष जोडिने अनुभव पाउनेछन्।

गाउँ भ्रमण, प्राकृतिक पदयात्रा, फेवा तालमाथि प्याराग्लाइडिङ र अन्नपूर्ण आधार शिविरसम्म पुग्ने साहसिक यात्राजस्ता गतिविधि पनि रिसोर्टका प्याकेजमा समेटिने छन्।

रिसोर्टका महाप्रबन्धकले हिमालयन हाइडअवे रिसोर्ट पोखरा नेपाली आत्मीयता र थाई आतिथ्यको संगम भएको उल्लेख गर्दै यसले पोखराको पर्यटनलाई नयाँ उचाइमा लैजाने विश्वास व्यक्त गरे। उनका अनुसार रिसोर्टले गुणस्तरीय सेवा, प्राकृतिक सौन्दर्य र सांस्कृतिक अनुभवलाई एकै ठाउँमा समेटेर उच्च खर्च गर्ने पर्यटकलाई आकर्षित गर्ने लक्ष्य राखेको छ।

सामाजिक उत्तरदायित्व र दिगो पर्यटन अवधारणालाई केन्द्रमा राख्दै रिसोर्टले स्थानीय समुदायसँग सहकार्य गर्दै रोजगारी सिर्जना, स्थानीय उत्पादनको प्रयोग र सीप विकासमा जोड दिएको जनाएको छ। व्यवस्थापनका अनुसार यस पहलले कास्कीकोट क्षेत्रको दीर्घकालीन सामाजिक–आर्थिक विकासमा सकारात्मक प्रभाव पार्ने अपेक्षा गरिएको छ। वातावरणीय संरक्षण र स्थानीय स्रोतको जिम्मेवार उपयोगमार्फत पर्यटन र प्रकृतिबीच सन्तुलन कायम राख्ने रणनीति पनि अपनाइएको छ।

पर्यटन विज्ञहरूका अनुसार पोखरामा लेकसाइड बाहिर उच्चस्तरीय रिसोर्ट सञ्चालनमा आउनु क्षेत्रीय पर्यटन विस्तारका लागि महत्वपूर्ण संकेत हो। यसले पर्यटकको बसाइ अवधि बढाउने, ग्रामीण क्षेत्रमा खर्च प्रवाह गर्ने र नयाँ रोजगारी सिर्जना गर्ने सम्भावना रहेको उनीहरूको भनाइ छ। साथै, अन्तर्राष्ट्रिय ब्रान्डको आगमनले सेवा गुणस्तर, व्यवस्थापन अभ्यास र गन्तव्य ब्रान्डिङमा समेत सकारात्मक प्रभाव पार्ने अपेक्षा गरिएको छ।

नेपालमा पछिल्ला वर्षहरूमा लक्जरी र अनुभव–केन्द्रित पर्यटनतर्फको माग बढ्दै गएको सन्दर्भमा हिमालयन हाइडअवे रिसोर्ट पोखराको सञ्चालनलाई महत्वपूर्ण उपलब्धिका रूपमा हेरिएको छ। सेन्टारा होटल्स एण्ड रिसोर्ट्सको अन्तर्राष्ट्रिय सञ्जालमा समावेश यस परियोजनाले नेपाललाई प्रिमियम हिमाली गन्तव्यका रूपमा विश्व बजारमा प्रवर्द्धन गर्न सहयोग पुग्ने विश्वास गरिएको छ।

कास्कीकोटको शान्त वातावरण, हिमाली दृश्य र अन्तर्राष्ट्रिय स्तरको आतिथ्य सेवासँगै हिमालयन हाइडअवे रिसोर्ट पोखराले पोखरा र आसपासका गन्तव्यलाई नयाँ पर्यटन सम्भावनातर्फ उन्मुख गराउने अपेक्षा गरिएको छ। उद्घाटनसँगै रिसोर्टले नियमित सेवा सुरु गरिसकेको छ भने आन्तरिक तथा अन्तर्राष्ट्रिय पर्यटकलाई लक्षित विशेष प्याकेज र अनुभवात्मक कार्यक्रम विस्तार गर्दै लैजाने योजना रहेको व्यवस्थापनले जनाएको छ।