जनताको विश्वास मजबुत बनाउने कपिलवस्तु–१ का उम्मेद्वार अतहरको प्रतिबद्धता 

काठमाडौं, माघ ७ : प्रतिनिधि सभा सदस्य निर्वाचन कपिलवस्तु क्षेत्र नम्बर १ का उम्मेद्वार अतहर कमाल मुसलमानले देशको भविष्य निर्धारण गर्ने महत्वपूर्ण अवसरका रूपमा चित्रण गर्दै मतदातासँग समर्थनको अपिल गरेका छन् । 

नेपाली कांग्रेसका उम्मेदवार रहेका मुसलमानले मतदातालाई सम्बोधन गर्दै उनले देश अहिले ऐतिहासिक मोडमा उभिएको उल्लेख गर्दै लोकतन्त्रलाई अझ सबल, जनउत्तरदायी र परिणाममुखी बनाउने जिम्मेवारी आम नागरिकको काँधमा आएको बताएका हुन् । उनले प्रतिनिधि सभा निर्वाचन केवल सत्ता प्रतिस्पर्धा मात्र नभई देशको दिशा र जनताको भविष्य निर्धारण गर्ने निर्णायक अवसर भएको धारणा व्यक्त गरे ।

नेपाली कांग्रेसले लोकतान्त्रिक मूल्य, समावेशिता, सामाजिक न्याय र जनताको सर्वोच्चतालाई केन्द्रमा राख्दै समयअनुसार आफूलाई परिमार्जन गर्दै आएको दाबी गर्दै उनले परिवर्तनलाई नेतृत्व गर्ने र चुनौतीलाई अवसरमा बदल्ने पार्टी नेपाली कांग्रेस रहेको बताए । उनले शिक्षा र स्वास्थ्य सेवामा सर्वसुलभ पहुँच सुनिश्चित गर्ने, युवालाई रोजगारी र उद्यमशीलतासँग जोड्ने, कृषि आधुनिकीकरण गर्ने, पूर्वाधार विकासलाई तीव्रता दिने तथा सुशासनमार्फत जनताको विश्वास मजबुत बनाउने प्रतिबद्धता जनाए ।

नेपाली कांग्रेसको तर्फबाट कपिलवस्तु क्षेत्र नम्बर १ मा उम्मेदवारी दिएका मुसलमानले आफू पदको आकांक्षाभन्दा पनि स्थानीय जनताको समस्या, पीडा र चाहनालाई संसदसम्म पुर्‍याउने साझा अभियानका रूपमा निर्वाचनलाई लिएको बताए ।