कोशी सरकार पुनर्गठन, एमाले–कांग्रेसबाट बने ५–५ मन्त्री
मुख्यमन्त्री कार्कीले कांग्रेस र एमालेबाट समान ५–५ मन्त्री बनाएका छन्। जसमा ८ मन्त्री र २ राज्यमन्त्री छन्।
मोरङ, पुस २२ : कोशी प्रदेश सरकार पुनर्गठन भएको छ। पुराना सबै मन्त्रीहरुलाई हटाउँदै मुख्यमन्त्री हिक्मतकुमार कार्कीले सरकार पुनर्गठन गरेका हुन्।
मुख्यमन्त्री कार्कीले कांग्रेस र एमालेबाट समान ५–५ मन्त्री बनाएका छन्। जसमा ८ मन्त्री र २ राज्यमन्त्री छन्।
मन्त्री बनेका सबैले आजै प्रदेश प्रमुख पर्शुराम खापुङबाट पद तथा गोपनीयताको शपथ लिएका छन्।
सरकारमा प्रदीपकुमार सुनुवारले भौतिक पूर्वाधार विकास मन्त्रालय, भीम पराजुलीले पर्यटन, वन तथा वातावरण मन्त्रालय, तिलचन पाठकले नेपानी, सिँचाइ तथा ऊर्जा मन्त्रालय, इन्द्रमणि पराजुली आन्तरिक मामिला तथा कानुन मन्त्रालय पाएका छन्।
विदुरकुमार लिङ्थेपले आर्थिक मामिला तथा योजना मन्त्रालय, रामप्रसाद महतोले सामाजिक विकास मन्त्रालय, मानबहादुर लिम्बूले स्वास्थ्य मन्त्रालय, इसाइल मन्सुरीले उद्योग, कृषि तथा सहकारी मन्त्रालयको जिम्मेवारी पाएका छन्।
शोभा चेम्जोङ भौतिक पूर्वाधार विकास राज्यमन्त्री र उमाकान्त गौतम विनाविभागीय राज्यमन्त्री नियुक्त भएका छन्।
