१० जनामा कोरोना भेटिएपछि कचनकवलका पाँच वडा सिल
झापा, जेठ ७ : झापाको कचनकवल गाउँपालिकाका १० जना कोरोना भाइरस सङ्क्रमित भएसँगै पाँच वडा सिल गरिएको छ।
दक्षिण झापासँग सीमा जोडिएको कचनकवलका वड....
झापा, जेठ ७ : झापाको कचनकवल गाउँपालिकाका १० जना कोरोना भाइरस सङ्क्रमित भएसँगै पाँच वडा सिल गरिएको छ।
दक्षिण झापासँग सीमा जोडिएको कचनकवलका वडा नं १ देखि ५ सम्मका वडा सिल गरिएको जिल्ला प्रहरी कार्यालय झापाका प्रहरी उपरीक्षक कृष्ण कोइरालाले बताए। गाउँपालिकामा सात वडा रहेका छन्।
शनिबार भारतको मुम्बइबाट आएका ३३ जनालाई केचना, पाठामारी र घेराबारीस्थित सीमा क्षेत्रबाट उद्धार गरी वडा नं २ स्थित पथरिया माध्यमिक विद्यालयको क्वारेन्टिनमा राखिएको थियो। उनीहरु सबैको पिसीआर परीक्षणका लागि कोशी अञ्चल अस्पताल स्वाब सङ्कलन गरी पठाइएको थियो।
उनीहरुमध्ये सोमबार साँझ एक २३ वर्षीय युवामा कोराना लागेको पुष्टि भएको थियो भने मङ्गलबार थप नौ जनामा पुष्टि भएको छ। उनीहरुलाई राखिएको क्वारेन्टिनमा समेत सिल गरिएको उनले बताए।
गाउँपालिकाकाको सीमा क्षेत्रबाट मात्र चार दिनभित्रमा एक सय ४६ जना नेपाल प्रवेश गरेका छन्। सीमा क्षेत्रमा आइपुगेका नेपालीलाई सुरक्षित तरिकाले क्वारेन्टिनमा ल्याएर राखिएको हुँदा गाउँबासीमा त्रास नफैलिएको अध्यक्ष अञ्जार आलामले बताए।
मङ्गलबार पुष्टि भएका नौ जनालाई नेपाल रेडक्रस सोसाइटी झापा र बनियानी स्वास्थ्यचौकीको एम्बुलेन्समार्फत विराटनगरस्थित कोभिड अस्पताल लगिएको स्वास्थ्य कार्यालय झापाका निमित्त प्रमुख ईश्वरी पौडेलले बताए। (रासस)
