मधेश प्रदेश सरकारमा भाडबन्डा विवाद चर्कियो
जनमत पार्टीले भने आफूले चाहेको उद्योग, वाणिज्य तथा पर्यटन मन्त्रालयको जिम्मेवारी नेकपा एसका कनिष पटेललाई दिएपछिकोमा असन्तुष्टि जनाउँदै सरकार छाड्ने संकेत पनि गरेको छ।
जनकपुर, पुस १ : सात दलीय गठबन्धनको निर्णय अनुसार मधेश प्रदेशमा नेपाली कांग्रेसको नेतृत्वमा बनेको अहिलेको सरकारमा दलहरुबीच असन्तुष्टि बढेको देखिएको छ।
मुख्यमन्त्री कृष्णा यादवले विश्वासको मत लिन अहिले बाँकी नै रहेको छ। मन्त्रिपरिषद् विस्तार गर्ने कार्य चलिरहेको छ । सोमबार मात्रै मन्त्रिपरिषद विस्तार गरेर दुईजना नयाँ मन्त्री नियुक्त गरिएको छ भने विना विभागीय मन्त्रीहरुको पनि मन्त्रालय तोकिएको छ।
यसैबीच जनमत पार्टीले भने आफूले चाहेको उद्योग, वाणिज्य तथा पर्यटन मन्त्रालयको जिम्मेवारी नेकपा एसका कनिष पटेललाई दिएपछिकोमा असन्तुष्टि जनाउँदै सरकार छाड्ने संकेत पनि गरेको छ।
जनमत पार्टीका केन्द्रीय वरिष्ठ उपाध्यक्ष एवम मधेश प्रदेशका पूर्वमन्त्री ई.बसन्त कुशवाहले आफ्नो सामाजिक सञ्जाल फेसबुकमा मधेश प्रदेश सरकारले गरेको भागबन्डाबाट जनमत पार्टी असन्तुष्ट भएको लेखेका छन्।
‘मधेश प्रदेश सरकारमा जनमत पार्टीको उपस्थिति दयनीय अवस्थामा आइपुगेको छ यस आर्थिक वर्षमा हामीले उद्योग, वाणिज्य तथा पर्यटन मन्त्रालय अन्तर्गत १०औं हजार रोजगारी सृजना गर्ने कार्यक्रम बजेटमा विनियोजन गरेका छौं। तर भागवन्डाको नाममा अरुलाई त्यो मन्त्रालय दिनु भनेको सम्पूर्ण रोजगारी कार्यक्रमलाई अल्पत्र पार्नु हो । जनमत पार्टीको उद्देश्य बमोजिम सरकारमा सुनिश्चिता नभए मधेश प्रदेश सरकारबाट अलग हुन तयार हुनुपर्छ,’ उनले लेखेका छन्।
वरिष्ठ उपाध्यक्ष कुशवाहाले बजेट निर्माणका बेला जनमत नेतृत्वको सरकार रहेकाले प्रदेशमा हजारौं रोजगारी सृजना हुनेगरी बजेट बनाइएको बताए। उनले पर्यटन मन्त्रालय जनमतले पाएको खण्डमा प्रदेशको १०औं हजार जनताले रोजगारी पाउन सक्ने दाबी गरेका छन्।
यता, जनता समाजवादी पार्टी नेपालले पनि अहिलेसम्म कुनै पनि मन्त्रालय लिएको छैन । जसपा नेपालले सभामुख र भौतिक पूर्वाधार मन्त्रालयको जिम्मेवारी माग गर्दै आएको छ। जनता समाजवादी पार्टी नेपाल मधेश प्रदेशका प्रमुख सचेतक रामआशिष यादवका अनुसार मुख्यमन्त्रीले कृष्णा यादवले विश्वासको मत लिईसकेपछि मात्र जसपा नेपालले मन्त्रालय बाँडफाँटमा दाबी गर्नेछ।
यता, सभामुख चयनका लागि मधेश प्रदेश सभाले पनि प्रक्रिया अगाडि बढाउने तयारी गरेको छ । भोलि बिहान ११ बजे मधेश प्रदेशकी उपसभामुख बबिता राउत ईशरको कार्यकक्षमा सर्वदलीय बैठक डाकिएको छ। भोलि नै दिउँसो १ बजे मधेश प्रदेश सभाको बैठक पनि बोलिएको छ।
