सभामुख र प्रमुख सचेतकहरूबीच छलफल : तीनवटा विधेयक पारित गरिने

काठमाडौं, भदौ १२ : प्रतिनिधिसभाले भदौ महिनामा विभिन्न महत्वपूर्ण विधेयकहरु पारित गर्नेगरी सभामुख देवराज घिमिरेले प्रमुख दलका प्रमुख सचेतकहरूसँग छलफल गरेका छन्।

बिहीबार भदौ महिनाको क्यालेन्डरबारे छलफल पश्चात सञ्चारमाध्यमसँग कुरा गर्दै नेकपा (एमाले)का मुख्य सचेतक महेश बर्तौलाले भूमिसँग सम्बन्धी विधेयक, नागरिकतासँग सम्बन्धित विधेयक र शिक्षा विधेयकलाई पारित गर्ने बताएका हुन्।

‘भोलिको बैठक (१३ गते) भूमिसँग सम्बन्धी विधेयकलाई कार्यसूचीमा राख्ने छौ र  पारित गरी राष्ट्रिय सभामा पठाउने छौं। भोलिको बैठकमा प्रधानमन्त्री केपी शर्मा ओलीज्यूले सम्बोधन गर्ने तालिका छ,’ उनले भने।

उनले संवैधानिक परिषद्को काम, कर्तव्य, अधिकार र कार्यविधीसँग सम्बन्धी ऐन राष्ट्रपति कार्यालयबाट फिर्ता भएको र त्यसलाई सभामा छलफल गरेर पारित गर्नेगरी कार्यसूचीमा राखेको पनि बताए।

‘१८ गते सम्भवतः नागरिकतासँग सम्बन्धीत विधेयक पारित गर्छौ। त्यसैगरी संवैधानिक परिषद्को काम, कर्तव्य, अधिकार र कार्यविधीसँग सम्बन्धी राष्ट्रपति कार्यालयबाट फिर्ता भएको त्यसलाई सभामा छलफल गरेर पारित गर्नेगरी कार्यसूचीमा राखेका छौ त्यो पारित गर्छौ,’ उनले भने, ‘हामी विशेषगरी २६ गते शिक्षा विधेयकलाई पारित गर्नेगरी लैजान्छांै यसरी यो महिना बैठक बसेर संघीयता कार्यान्वयनसँग जोडिएको महत्वपूर्ण विधेयक शिक्षा विधेयक पारित गर्छौं।’

बैठकमा नेपाली कांग्रेसका प्रमुख सचेतक श्याम घिमिरे, नेकपा माओवादी केन्द्रका प्रमुख सचेतक हितराज पाण्डे, राष्ट्रिय स्वतन्त्र पार्टीका प्रमुख सचेतक सन्तोष परियार र राष्ट्रिय प्रजातन्त्र पार्टीका सांसद बिना लामा सहभागी थिए।