पूर्वराष्ट्रपति यादवद्वारा ‘सत्सङ्गदीक्षा’ पुस्तकको लोकार्पण, नेपाली समाजलाई नैतिक मार्गदर्शन दिने विश्वास
उनले नेपालमा सनातन बैद्धिक परम्पराको गहिरो जड रहेको उल्लेख गर्दै त्यस्तो परम्पराको संरक्षण र अध्ययनमा लाग्ने व्यक्तिहरु कम रहेकोप्रति चिन्ता व्यक्त गरे।
काठमाडौं, असार २८ : पूर्वराष्ट्रपति डा. रामवरण यादवले शनिबार काठमाडौंको वसन्तपुर दरबारस्थित हनुमानढोका संग्रहालय प्राङ्गणमा आयोजित एक विशेष समारोहमा ‘सत्सङ्गदीक्षा’ पुस्तकको नेपाली संस्करण लोकार्पण गरेका छन्।
संस्कृति, पर्यटन तथा नागरिक उड्डयन मन्त्रालय अन्तर्गत हनुमानढोका दरबार संग्रहालय विकास समिति र स्वामिनारायण सेवा संस्था नेपालको संयुक्त आयोजनामा सम्पन्न कार्यक्रममा बोल्दै पूर्वराष्ट्रपति यादवले पुस्तकमा समेटिएको शिक्षाले नेपाली समाजका लागि मार्गदर्शक हुने विश्वास व्यक्त गरे।
‘स्वामी भद्रेस दासले जुन ३१५ सूत्रहरु संस्कृतिबाट गुजराती हुँदै नेपाली भाषामा सरल शैलीमा लेख्नु भएको छ, त्यो समाज सुधारका लागि अत्यन्तै उपयोगी छ,’ पूर्वराष्ट्रपति यादवले भने, ‘मानव–मानवबीच कसरी आपसी सम्मान कायम राख्ने, समाजलाई सकारात्मक दिशातर्फ कसरी उन्मुख गराउने भन्ने कुराहरु यसमा सूत्रवद्ध ढंगले प्रस्तुत गरिएका छन्।’
उनले नेपालमा सनातन बैद्धिक परम्पराको गहिरो जड रहेको उल्लेख गर्दै त्यस्तो परम्पराको संरक्षण र अध्ययनमा लाग्ने व्यक्तिहरु कम रहेकोप्रति चिन्ता व्यक्त गरे।
‘हाम्रो संस्कृति र परम्पराको गहिरो अध्ययन गर्नेहरूको संख्या न्यून छ। यस्तो अवस्थामा स्वामी भद्रेस दासले जुन कार्य गर्नुभएको छ, त्यो उल्लेखनीय छ,’ यादवले भने।
पुस्तकमा धार्मिक, नैतिक तथा सामाजिक मूल्य–मान्यतामा आधारित ३१५ वटा सूत्र समेटिएका छन्।