स्याङ्जाको पुतलीबजार देखि दुलेगौंडा सडकखण्ड कालोपत्रे, स्थानीयलाई राहत 

काठमाडौं, असार २० : स्याङ्जाको पुतलीबजार नगरपालिका –१, शिक्षाचोकबाट काल्खु हुँदै तनहुँको शुक्लागण्डकी दुलेगौँडा जाने स्याङ्जा खण्डको सडक कालोपत्रे भएको छ । 

विश्व बैँकको ऋण सहयोगमा नेपाल सहरी शासकीय तथा पूर्वाधार आयोजना काठमाडौँ अन्तर्गत पुतलीबजार नगरपालिकाले कालोपत्रे गरिएको नगर प्रमुख तुलसीराम रेग्मीले जानकारी दिए । विश्व बैँकको ऋणमा सरकारले आयोजनामार्फत देशका १७ नगरपालिकाका २१ वटा सडक कालोपत्रे गर्ने गरी काम अगाडि बढाएकोमा यो एउटा सडक हो । 

निर्माण कम्पनीले २०८० चैत २७ गते १५ महिनामा सक्ने गरेर पुतलीबजार नगरपालिकासँग सम्झौता गरेको इन्जिनियर सुदीप बरालले जानकारी दिए । बरालका अनुसार सडक ४६ करोड तीन लाख ८९ हजार ६९ रुपैयाँमा सम्झौता भएको थियो । सडकको मुख्य काम सम्पन्न भएको छ भने सामान्य काम बाँकी छन् । 

अहिले उक्त सडकको डाडास्वारासम्मको सडक कालोपत्रे भईसकेको छ भने बाँकी सडकका लागि पनि नगरपालिकाले पहल गरिरहेकोले छिट्टै बाँकी सडक पनि कालोपत्रे हुने नगरप्रमुख रेग्मीले बताए । यो सडक कालोपत्रे भएसँगै स्याङ्जा र तनहुँको दुरी अझ छोटो हुने र स्थानीयहरुलाई सहज हुने अपेक्षा गरिएको छ ।