युद्ध अन्त्य गर्न युक्रेनी र रुसी प्रतिनिधिमण्डल सहमति नजिक

एजेन्सी, जेठ ३ : युक्रेनमा जारी युद्ध अन्त्य गर्न युक्रेनी र रुसी प्रतिनिधिमण्डलले दुई घन्टा वार्ता गरेका छन्। शुक्रबार टर्कीको इस्तानबुलमा वार्ता भएको हो। 

उक्त वार्तापछि युक्रेनी रक्षामन्त्री रुस्तम उमरोभले दुवै देशले एक–एक हजार युद्धबन्दी रिहा गर्न सहमत भएको जानकारी दिएका छन्।

‘हामीले युद्धविराम र मानिसहरू आदानप्रदानका विषयमा छलफल गर्‍यौं। एक हजार मानिस (युद्धबन्दी) रिहाइ गर्ने सहमति हाम्रो बैठकको परिणाम हो,’ उनले भने।

दुवै पक्षले चाँडै नै सम्भावित युद्धविरामको बारेमा आफ्नो विस्तृत विचार प्रस्तुत गर्ने जनाएका छन् र त्यसपछि वार्ता अगाडि बढ्नेछ। सो क्रममा युक्रेनले दुई राष्ट्रपतिहरू बीच प्रत्यक्ष वार्ताको प्रस्ताव गरेको थियो।

युक्रेनी पक्षले रुसी राष्ट्रपति भ्लादिमिर पुटिन र युक्रेनी राष्ट्रपति भोलोदिमिर जेलेन्स्कीबीच प्रत्यक्ष वार्ता होस् भनेर अनुरोध गरेको थियो। 

युक्रेनी रक्षामन्त्री रुस्तेम उमरोभलाई उद्धृत गर्दै सरकारी अनाडोलु एजेन्सीले दुवै पक्षले तीन प्रमुख विषयहरूमा ध्यान केन्द्रित गरेको बताएका छन्। युद्धविराम, कैदी आदानप्रदान र भविष्यमा हुने राष्ट्रपति शिखर सम्मेलनको सम्भावना रहेको जनाइएको छ।

वार्ताको अध्यक्षता गर्ने टर्कीका विदेशमन्त्री हाकान फिदानले बैठकले विश्वास निर्माण गर्ने र भविष्यका वार्ताहरूको जग बसाल्ने उद्देश्यले धेरै महत्त्वपूर्ण परिणामहरू निकालेको बताएका छन्।

आइतबार पुटिनले युक्रेनसँग प्रत्यक्ष वार्ता पुनः सुरु गर्ने प्रस्ताव गरेपछि इस्तानबुल वार्ता हुँदैछ। 

जेलेन्स्कीले पहिले नै पुटिनसँग प्रत्यक्ष भेटघाटको लागि खुला रहेको बताएका थिए। यद्यपि, क्रेमलिनले पुटिनले वार्तामा भाग नलिने बताएको छ। युक्रेन र रुसबीचको अन्तिम प्रत्यक्ष वार्ता मार्च २०२२ मा इस्तानबुलमा भएको थियो।