नेपालकै पहिलो नवग्रह मन्दिरमा भक्तजनको घुईचो, ८० लाख भेटी संकलन

स्याङ्जा, वैशाख ११ : स्याङ्जाको अर्जुनचौपारी गाउँपालिकामा रहेको नेपालकै पहिलो नवग्रह मन्दिरका भक्तजनहरुको घुईचो लाग्ने गरेको छ । अर्जुनचौपारी गाउँपालिका –१ मा रहेको नेपालकै पहिलो नवग्रह मन्दिरमा गत फागुनमा ९ दिने धार्मिक महोत्सव गरी उद्घाटन गरिएको मन्दिरका दैनिक जसो भक्तजनहरुको भीड लाग्ने गरेको हो । 

मन्दिर व्यवस्थापन समितिका अध्यक्ष भरतराज पोखरेलका अनुसार मन्दिरमा शनिवार बिशेष पुजा हुने भएकोले अन्य दिनमा भन्दा शनिवार भक्तजनहरुको वढी भीड लाग्ने गरेको छ ।

मन्दिर व्यवस्थापन समितिका अनुसार हालसम्म ३ लाख भन्दा बढी भक्तजनहरुले दर्शन गरिसकेका छन्  । मन्दिर भारतको आसामको भन्दा फरक रहेको र यो नवग्रह मन्दिर विश्वकै पहिलो भएको पालिका अध्यक्ष प्रकाश तिवारीले बताए । 

नवग्रह मन्दिर शनिवार मात्र खुल्नेछ र ९ चक्र मध्ये एक चक्र भने भक्तजनहरुलाई मध्यनजर गरेर अन्य दिनमा पनि पुजाआजा गर्न पाईनेछ । २७ फिट माथीतीर फर्केको अग्लो ब्रह्माणीय मुर्तीको अवलोकन प्रत्येक बर्षको गणेश चतुदर्शीमा मात्र दर्शन गर्न पाइनेछ । 

८० लाख भेटी संकलन

मन्दिरमा स्वतः स्र्फूत हालसम्म करिब ८० लाख भेटी संकलन भएको पोखरेलले बताए ।

मन्दिरका ९ दिने धार्मिक महोत्सवमा ७७ लाख ६८ हजार रुपैयाँ संकलन भएको थियो भने पछि आउने भक्तजनहरुबाट समेत संकलन गरिएको रकम जोड्दा करिब ८० लाख पुगेको उनले बताए ।

यसरी संकलन भएको रकम मन्दिरको भौतिक संरचना निर्माण, दैनिक पुजाआजा र नवग्रह मन्दिरलाई विश्वसामु चिनाउनका लागि खर्च गरिने र बाँकी रकम कोष बनाएर संकलन गरिने पालिका अध्यक्ष तिवारीले बताए ।