सर्लाहीको जंगलमा पासो थाप्दै गरेका तीन जना पक्राउ

सर्लाही, वैशाख २२ : सर्लाहीको जंगलमा पासो थाप्दै गरेका तीन जना पक्राउ परेका छन। वागमती नगरपालिका–१० शङ्करपुरको जंगलबाट वन्यजन्तु मार्न पासो थाप्दै गरेका उनीहरू पक्राउ परेका हुन् हो। 

पक्राउ पर्नेमा वागमती नगरपालिका–४ का चन्द्रबहादुर ब्लोन,  नगरपालिका–२ का सन्देश मोक्तान र त्यही वडाका भीमबहादुर डिमडुम रहेका छन्। आइतबार दिउँसो जंगली वन्यजन्तु मार्न पासो थाप्दै गरेको अवस्थामा सव डिभिजन वन कार्यालय मूर्तियाबाट खटिएको सशस्त्र वन रक्षकको टोलीले उनीहरुलाई पक्राउ गरेको थियो। 

वन रक्षक टोलीलाई देखेर अन्य शिकारी भागेका छन्। सशस्त्र वन रक्षक टोलीले घटनास्थलबाट ठूलो परिमाणमा वन्यजन्तु मार्न प्रयोग गरिने पासो र बा ७० प ३५७८ नम्बरको पल्सर मोटरसाइकल बरामद गरेको छ। पक्राउ परेका तीनै जनालाई सव डिभिजन वन कार्यालय मूर्तियामा राखेर थप अनुसन्धान भइरहेको जनाइएको छ।

लकडाउनको समयमा सर्लाहीको जंगलमा वन्यजन्तुको चोरी शिकार गर्ने क्रम बढेको स्थानीयले जनाएका छन्। केही दिनअघि मात्र वन्यजन्तु मार्न हानेको भरुवा बन्दुकको गोली लागेर मूर्तिया जंगलमा दुई जना घाइते भएका थिए।