‘पूर्वराजा जस्तो मान्छेले राजनीतिक रुपमा साथ माग्नु उचित हुँदैन’ 

काठमाडौं, फागुन १३ : नेकपा एमालेका सांसद रघुजी पन्तले राजनीतिक रुपमा आह्वान गरेर साथ दिनुपर्यो भन्ने कुरा पूर्वराजा जस्तो मान्छेलाई नसुहाउने बताएका छन्। 

मंगलबार प्रतिनिधि सभाको बैठकपश्चात पत्रकारले सोधेको प्रश्नको जवाफ दिदैँ उनले नेपालमा राजालाई सम्मानपूर्वक संसदबाट गणतन्त्र घोषणा गरेर संविधान बनाएर बिदा गरेको भन्दै अहिले आएर राजनीतिक रुपमा आह्वान गरेर साथ दिनुपर्यो भनेर भन्नु पूर्व राजालाई नसुहाउने बताए। 

‘अरु देशमा राजाहरु काटिएका र फालिएका इतिहास छन्। तर हामीले शान्तिपूर्ण तरिकाले, त्यतिधेरै दमन गरेपनि राजालाई सम्मानपूर्वक संसदबाट गणतन्त्र घोषणा गरेर संविधान बनाएर बिदा गरेका हौं । यसको साथै उहाँलाई पूर्व राष्ट्राध्यक्षको सम्मान पनि दिएको छ,’ उनले भने, ‘त्यो खालको सुरक्षा पनि छ, यो सम्मानलाई त हिजोको राजाले बोक्न सक्नु पर्यो नि त्यो सम्मान बोक्न नसकेर राजनीतिक रुपमा आह्वान गरेर साथ दिनुपर्यो भन्ने कुरा प्रचण्ड जीलाई सुहाउँछ, राजेन्द्र लिङदेनजीलाई सुहाउँछ अरु राजनीतिक दलहरुलाई सुहाउछ पूर्वराजालाई त्यो सुहाउँदैन।’

सांसद पन्तले जनतामा भएको असन्तुष्टिलाई सम्बोधन गर्नुपर्ने भन्दै चाहेको जस्तो विकास नभएपनि विकासका काम भने भएको बताए।