लोकप्रिय बन्दै नेपालकै पहिलो नवग्रह मन्दिर, हालसम्म ७५ हजार बढीले गरे दर्शन 

काठमाडौं, फागुन १३ : नेपालकै पहिलो नवग्रह मन्दिरको अनुष्ठान, गीता ज्ञान महायज्ञ तथा धार्मिक महोत्सवमा एक करोड २५ लाख दिप प्रज्वलन गरिएको छ ।

अर्जुनचौपारी गाउँपालिका–१ जलबराह धार्मिक वनमा निर्माण भएको नवग्रह मन्दिरमा आयोजना गरिएको अनुष्ठान, गीता ज्ञान महायज्ञ तथा धार्मिक महोत्सवको सातौ दिनमा दिप प्रज्वलन गरिएको हो । गत फागुन ६ गतेबाट शुरु भएको  धार्मिक महोत्सव फागुन १४ गते महाशिवरात्रीसम्म चल्नेछ । सवाँ करोड दिप यहाँको नवग्रह मन्दिर, षट्कोण शिवालय र पञ्चकन्या मन्दिरमा एकै चोटी प्रज्वलन गरिएको हो । 

दिप प्रज्वलनमा हजारौको सख्यामा भक्तजनको सहभागिता रहेका थियो । नवग्रह मन्दिरमा गरिएको धार्मिक महोत्सवमा दैनिक हजारौ भक्तजनले पूजाआजा तथा दर्शन गरेका छन् । मन्दिरमा पुजाको तथा दर्शनको लागि दैनिकजसो भक्तजनको घुईचो लाग्दा लाइन लगाउनु परेको छ । अनुष्ठान, गीता ज्ञान महायज्ञ तथा धार्मिक महोत्सवको सातौँ दिन सम्म ७५ हजार भन्दा धेरै भक्तजनले पूजाआजा तथा दर्शन गरेको गाउँपालिका अध्यक्ष प्रकाश तिवारीले बताए । 

देश भित्रबाट मात्र नभई छिमेकी देश भारत, जिल्ला मात्र नभई पुर्वको झापा देखी पश्चिमको कञ्चनपुर सम्मका भक्तजनले यहाँको नवग्रह मन्दिरमा पूजाआजा र दर्शन गरेको तिवारीको भनाई थियो ।अनुष्ठान एवं धार्मिक महोत्सवमा आचार्य श्री चैतन्वय कृष्ण महाराज गूरु प्रमुख बाचक रहेका छन् भने यहाँ डाक्टर केएन स्वामीले समेत शनिबार धार्मिक प्रवचन दिएका थिए ।

१५७ रोपनी क्षेत्रफलमा फैलिएको यस धार्मिक वनमा नवभूज आकारको आकाश तर्फ फर्केको २७ फिट अग्लो नवग्रह मन्दिर बनाइएको छ । पिलरको १४ फिटमा सुर्य, शुक्र, केतु, चन्द्र, मङगल, बुध, शनि, बृहस्पती र राहुका प्रतीक राखिएको छ भने पिलरको नौ वटा भुजामा ग्रह अनुसारका रङ लगाइएको छ । 

नवग्रह मन्दिरसँगै षट्कोण शिवालय बनाइएको छ भने षट्कोण शिवालयको बीचमा पशुपतिनाथको जस्तै पञ्चमुखी शिवलिङग (सात क्वीन्टल) र कोणमा गणेश, कुलदेवता, लक्ष्मी, कालभैरव, हनुमानको मूर्ति राखिएको छ । मन्दिरमा आउने हरेक भक्तजनलाई रुद्राक्षको माला लगाउने ब्यवस्था गरिएको छ भने भोकै आउनेलाई निःशुल्क खानाको ब्यवस्था गरिएको छ ।