नेप्से परिसूचकमा झिनो अङ्कको सुधार
आज नेप्से परिसूचक २.४१ अङ्कले बढेर दुई हजार ७३० को विन्दुमा कायम भएको हो ।
काठमाडौं, माघ २१ : यो साता कारोबारको पहिलो दिन उच्च अङ्कले बढेको नेपाल स्टक एक्सचेञ्ज (नेप्से) परिसूचकमा आज भने झिनो अङ्कको मात्रै वृद्धि देखिएको छ। आज नेप्से परिसूचक २.४१ अङ्कले बढेर दुई हजार ७३० को विन्दुमा कायम भएको हो ।
आज ३१७ कम्पनीको दुई करोड ३७ लाख ७० हजार ३४८ कित्ता शेयर एक लाख ११ हजार ९१८ पटक खरिदबिक्री हुँदा ११ अर्ब ८७ करोड ५९ लाख ६७ हजार बराबरको कारोबार भएको छ।
आजको कारोबारमा बैङ्किङ ०.५४, जीवन बीमा ०.६७, उत्पादन तथा प्रशोधन ०.२७, लघुवित्त ०.१०, म्युचुअल फन्ड ०. ७८, निर्जीवन बीमा ०.८२ र व्यापार समूह ०.७९ प्रतिशतले बढेको छ।
अरू सबै समूहको उपसूचक घटेको छ । विकास बैङ्क ०.३९, वित्त १.०७, होटल तथा पर्यटन ०.०१, जलविद्युत् ०.४८ र लगानी समूह ०.४७ प्रतिशतले घटेको हो।
उपकार लघुवित्त वित्तीय संस्था लिमिटेड र भूगोल इनर्जी कम्पनी लिमिटेडको शेयर मूल्यमा सकारात्मक ‘सर्किट’ लागेको छ । त्यस्तै, ग्रिन डेभलपमेन्ट बैङ्क र रिभर फल्स पावर लिमिटेडको शेयर मूल्यमा भने नकारात्मक सर्किट लागेको छ।
कारोबार रकमका आधारमा आज सबैभन्दा धेरै एनआरएन इन्फ्रास्ट्रक्चर एन्ड डेभलपमेन्ट लिमिटेडको रु ३५ करोड ३० लाख ७५ हजार बराबरको कारोबार भएको छ।
कारोबार भएका शेयर सङ्ख्याका आधारमा भने सबैभन्दा धेरै बरुण हाइड्रोपावर कम्पनी लिमिटेडको ६ लाख ३४ हजार ६२० कित्ता शेयर किनबेच भएको छ ।